2025 جىلدىڭ 2 شىلدەسىنەن «وتباسى بانك» اق الدىن الا جانە ارالىق تۇرعىن ءۇي زاەمدارىن مەرزىمىنەن بۇرىن تولىق وتەۋ تارتىبىنە وزگەرىس ەنگىزەدى. بۇل تۋرالى بانكتىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
قانداي وزگەرىستەر بار؟- جيناق اۆتوماتتى تۇردە قارىزدى جابۋعا كەتەدى. ەگەر كليەنت الدىن الا نەمەسە ارالىق زاەمدى تولىق مەرزىمىنەن بۇرىن وتەيتىن بولسا، وعان بايلانعان دەپوزيتتەگى بارلىق جيناق سوماسى اۆتوماتتى تۇردە قارىزدىڭ نەگىزگى سوماسىن وتەۋگە جۇمسالادى.
- دەپوزيت شارتى بۇزىلادى. قارىز تولىق جابىلعان سوڭ، تۇرعىن ءۇي قۇرىلىس جيناقتارى تۋرالى شارت مىندەتتى تۇردە توقتاتىلادى.
- جاڭا زاەم الۋ ءۇشىن جاڭا دەپوزيت قاجەت. كەيىنگى كەزەڭدە جاڭا تۇرعىن ءۇي زاەمىن الۋ ءۇشىن كليەنت جاڭا دەپوزيت اشۋى كەرەك نەمەسە بۇرىنعى قارىزعا قاتىسى جوق دەپوزيتىن پايدالانا الادى.
ءباسپاسوز قىزمەتىنىڭ حابارلاۋىنشا، بۇل قادام تۇرعىن ءۇي قۇرىلىس جيناقتارى (تقج) جۇيەسىنىڭ تۇراقتىلىعىن ساقتاۋ ماقساتىندا قولعا الىنعان. تقج جۇيەسى ءوزارا قولداۋ قاعيداتىمەن جۇمىس ىستەيدى: كەيبىر سالىمشىلار قاراجات جيناپ جاتقاندا، باسقالارى وسى جيناقتار ەسەبىنەن جەڭىلدەتىلگەن مولشەرلەمەمەن (جىلدىق 3,5%-دان 8,5%-عا دەيىن) نەسيە الا الادى.
بۇرىن الدىن الا نەمەسە ارالىق زاەم العان كليەنتتەر، نەگىزىنەن، تۇرعىن ءۇي جاعدايلارىن جاقسارتۋ ماقساتىن جۇزەگە اسىرىپ ۇلگەردى. 2025 جىلدىڭ 2 شىلدەسىنەن باستاپ، ەگەر ولار قارىزىن تولىق مەرزىمىنەن بۇرىن وتەيتىن بولسا، وندا دەپوزيتتەگى جيناق سول قارىزدى جابۋعا باعىتتالادى جانە بۇل دەپوزيت جابىلادى.
بۇعان دەيىن بۇل ەرەجەلەر 2 ماۋسىمدا كۇشىنە ەنۋى ءتيىس بولعان، بىراق بانك كليەنتتەرگە بەيىمدەلۋگە قوسىمشا ۋاقىت بەرۋ ءۇشىن ەنگىزۋ مەرزىمىن ءبىر ايعا شەگەردى.
