تالعار قالاسىنىڭ اكىمى ارىستانبەك ابىلقايىرۇلى قىزمەتىنەن كەتتى. بۇل تۋرالى ول قالا اكىمدىگىنىڭ جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى.
«ەڭ الدىمەن، ماعان سەنىم ارتىپ، سايلاۋعا قاتىسىپ، داۋىس بەرگەن بارشاڭىزعا العىسىم شەكسىز. سىزدەردىڭ قولداۋلارىڭىز بەن سەنىمدەرىڭىز مەن ءۇشىن ۇلكەن جاۋاپكەرشىلىك جۇكتەدى. مەن اتقارعان قىزمەتىمدى دەنساۋلىعىما بايلانىستى اياقتاۋ تۋرالى شەشىم قابىلدادىم. بۇل شەشىم مەن ءۇشىن وڭاي بولعان جوق. دەنساۋلىعىما بايلانىستى بەلگىلى ءبىر ۋاقىت ەڭبەك دەمالىسىندا بولدىم. وسى جاعداي قىزمەتتىك مىندەتتەرىمدى تولىق ءارى ساپالى اتقارۋعا كەدەرگى كەلتىرمەۋى ءۇشىن وسىنداي شەشىم قابىلداۋدى ءجون سانادىم. دەگەنمەن، دەنساۋلىق – ادام ومىرىندەگى ەڭ باستى قۇندىلىقتاردىڭ ءبىرى، سوندىقتان وسىنداي قادامعا بارۋعا تۋرا كەلدى»،-دەپ جازدى اكىم.
ارىستانبەك ابىلقايىرۇلى 1 جىلدان استام ۋاقىت ىشىندە بىرقاتار جۇمىس اتقارىلعانىن اتاپ ءوتتى.
«تالعار قالاسىندا 1 جىل 2 اي قىزمەت اتقارۋ بارىسىندا الەۋمەتتىك-ەكونوميكالىق دامۋعا، ينفراقۇرىلىمدى جاقسارتۋعا جانە تۇرعىنداردىڭ ءومىر ساپاسىن ارتتىرۋعا باعىتتالعان بىرقاتار جۇمىستار جۇزەگە اسىرىلدى. ءاربىر باستاما مەن جوبانىڭ ارتىندا ورتاق ەڭبەك، بىرلىك پەن سەنىم تۇرعانىن ەرەكشە اتاپ وتكىم كەلەدى. وسى رەتتە ماعان قولداۋ بىلدىرگەن تالعار اۋدانىنىڭ اكىمىنە، ارىپتەستەرىمە، تالعار قالاسىنىڭ تۇرعىندارىنا جانە اقساقالدارىنا ەرەكشە العىسىمدى ايتامىن. الداعى ۋاقىتتا دا تالعار قالاسىنىڭ دامۋىنا بەيجاي قاراماي، ەل يگىلىگى جولىنداعى باستامالارعا تىلەكتەس بولامىن. قالامىزدىڭ بولاشاعى جارقىن، دامۋى قارقىندى بولارىنا سەنىمدىمىن»،-دەپ تۇيىندەدى اكىم.
