“زاڭنىڭ شيكى تۇسىن اشىپ وقۋعا كەڭەس بەرەم”: سىرىمبەك تاۋ ءوزىن نە ءۇشىن سايلاۋدان شەتتەتكەنىن ايتتى

2709
Adyrna.kz Telegram
فوتو: instagram.com/syrymbek_tau
فوتو: instagram.com/syrymbek_tau

بەلگىلى كاسىپكەر سىرىمبەك تاۋ ءوزىن نە ءۇشىن سايلاۋدان شەتتەتكەنىن ايتتى. بۇل تۋرالى ول ءوزىنىڭ Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى. 

“ارداقتى الاش، قادىرمەندى قازاعىم – ەكى-ءۇش كۇن بولدى الەۋمەتتىك جەلىدەگىنىڭ جەل شىعاراتىن جالعىز تەماسى سىرىمبەك تاۋ بولىپ تۇر... مەن، سىزدەرگە ماسەلەنىڭ ءمان-جايىن تۇسىندىرە كەتەيىن. 2004 جىلى قازاقستانعا كوشىپ كەلدىم. 2006 جىلدان بەرى تۇراقتى تىركەۋدەمىن. مەن وقىعان قر اتازاڭىنىڭ 51 بابى، 4-ءشى تارماعىندا «قازاقستان رەسپۋبليكاسىنىڭ ازاماتتىعىندا تۇراتىن «جانە» ونىڭ اۋماعىندا سوڭعى ون جىلدا تۇراقتى تۇرىپ جاتقان ادام پارلامەنت دەپۋتاتى بولا الادى»-دەپ، انىق جازىلعان. كونستيتۋتسيادا «قر ازاماتتىعىندا تۇراتىن» جانە دەپ تۇر عوي!!! قازاقشا ۇعاتىن ادام رەتىندە «ازاماتتىعى بار ادام» سايلاۋعا قاتىسا الادى دەپ تۇر. ودان كەيىن جاڭاعى جانە دەگەن سوزدەن كەيىن 10 جىل تۇراقتى تۇراتىن دەگەن ەكىنشى وي، ەكىنشى تالاپ جازىلعان. اتازاڭنىڭ وسى سوزىنە سۇيەنە وتىرىپ، دوكۋمەنت تاپسىردىم. مەنىڭ قولىما قازاقستان رەسپۋبليكاسىنىڭ قۇجاتى 2013-جىلدىڭ تامىزدىڭ سەگىزى كۇنى قولىما بەرىلدى. بىراق، كونستيتۋتسيادا تولقۇجات دەپ تۇرعان جوق قوي. وندا ازاماتتىعى بار ادام جانە ون جىل ەلدە تۇراقتى تۇرعان ادام دەپ جازۋلى تۇر! اينالىپ كەلگەندە، مەن قر ازاماتىمىن! ول ازداي 10 جىلدان ارتىق ەل اۋماعىندا تۇردىم. ءالى دە امان بولسام تۇرا بەرەمىن!

قاي زاڭنىڭ، قانداي تالابىنا سۇيەنگەنىن بىلمەيمىن تسيك: مەنىڭ تولقۇجات العان داتاسىنا قاراپ مەنى سايلاۋدان شەتتەتتى.  ورتالىق سايلاۋ كوميسسياسى ماعان قيانات جاساپ، ادەيى بۇرمالادى دەۋدەن اۋلاقپىن. بىراق، كەلەسى پارلامەنتتە وتىراتىن ازاماتتار وسىنداي اركىم ءارتۇرلى تۇسىنەتىن زاڭداردى تۇزەيدى دەپ سەنەم.

كەشەلى بەرى، سىرىمبەك ءوزىنىڭ تەكسەرىستەن وتپەيتىنىن بىلە تۇرا نە ءۇشىن سايلاۋعا قاتىسادى، جۇرتتى بوسقا دۇرلىكتىرەدى دەپ جاتقان تىرناقشا ىشىندەگى تىلەۋلەستەرىمە: زاڭنىڭ شيكى تۇسىن اشىپ وقۋعا كەڭەس بەرەم!”، دەپ جازدى كاسىپكەر.

 

پىكىرلەر