يسپانيانىڭ كولىك ءمينيسترى وسكار پۋەنتە ەلدىڭ ورتالىق بولىگىندە بولعان تەمىرجول اپاتىنان التى كۇن وتكەن سوڭ قىزمەتىنەن كەتەتىنىن مالىمدەدى. اپات سالدارىنان 69 ادام قازا تاپقان. بۇل تۋرالى ول پارلامەنتتە مالىمدەدى، دەپ حابارلايدى «ادىرنا» ءتىلشىسى.
مينيستر ۋردا قالاشىعى ماڭىندا مادريدتەن وڭتۇستىككە قاراي 100 شاقىرىم جەردە ەكى پويىزدىڭ سوقتىعىسۋىنا قاتىستى ەسەپ بەرۋ كەزىندە وتستاۆكاعا كەتۋ تۋرالى شەشىمىن جاريالاعان.
«يسپانيا سياقتى ەلدە ءبىر جىلدىڭ ىشىندە وسىنداي ەكى ءىرى توتەنشە جاعداي بولسا، كولىك ءمينيسترى قىزمەتىندە قالا المايدى»، – دەدى وسكار پۋەنتە.
28 قازان كۇنى تاڭەرتەڭ يسپانيانىڭ ورتالىق بولىگىندەگى ۋردا قالاشىعى ماڭىندا مادريد – سەۆيليا باعىتىنداعى تەمىرجول جەلىسىندە مەملەكەتتىك Renfe كومپانياسىنا تيەسىلى جوعارى جىلدامدىقتى پويىز Iryo كومپانياسىنىڭ جولدا تۇرعان قۇرامىمەن سوقتىعىسقان ەدى. اپات سالدارىنان 69 ادام قازا تاۋىپ، ونداعان ادام جاراقات العان.
مينيستر اتاپ وتكەن ەكى اپاتتىڭ العاشقىسى 18 قاڭتاردا يسپانيانىڭ وڭتۇستىگىندەگى اندالۋسيا ايماعىندا، ادامۋس قالاسىندا بولعان. وندا دا Renfe جانە Iryo كومپانيالارىنىڭ پويىزدارى سوقتىعىسىپ، 46 ادام قازا تاپقان، 200-دەن استامى جاراقات العان.
وتكەن اپتانىڭ سوڭىندا، 30 قازاندا وسكار پۋەنتە قىزمەتىنەن كەتۋدى جوسپارلامايتىنىن مالىمدەگەن ەدى.
«قازىر مەنىڭ مىندەتىم – قىزمەتىمدە قالۋىم كەرەك پە، جوق پا دەگەن ماسەلەنى تالقىلاۋ ەمەس، تۋىنداعان ماسەلەنى شەشۋ. قىزمەتتەن كەتۋ مەن ءۇشىن الدەقايدا وڭاي بولار ەدى. الايدا بۇل مەنىڭ مىنەزىمە دە، پرەمەر-ءمينيستردىڭ ماعان تاپسىرعان مىندەتىنە دە ساي كەلمەيدى»، – دەگەن بولاتىن مينيستر وپپوزيتسيانىڭ وتستاۆكاعا كەتۋ تۋرالى تالابىنا جاۋاپ بەرىپ.
الايدا ول قازىرگى مالىمدەمەسىندە پارلامەنتتە وتستاۆكاعا كەتۋ تۋرالى شەشىمدى 28 قازاندا، ياعني تەمىرجول اپاتى بولعان كۇنى قابىلداعانىن ايتقان.
