تەمىرجول كولىگى قىزمەتكەرلەرىنىڭ كاسىبي مەرەكەسى قارساڭىندا كۇردەلى جوندەۋدەن وتكەن ورال تەمىرجول ۆوكزالى پايدالانۋعا بەرىلدى.
سالتاناتتى ءىس-شاراعا وبلىس اكىمى ناريمان تورەعاليەۆ، قر كولىك ءمينيسترى نۇرلان ساۋرانباەۆ، «قازاقستان تەمىر جولى» ۇلتتىق كومپانياسىنىڭ قۇرىلىس جونىندەگى باسقارۋشى ديرەكتورى مارات ەسقاليەۆ، سالا قىزمەتكەرلەرى مەن ارداگەرلەرى، ءوڭىر تۇرعىندارى مەن قوناقتارى قاتىستى.
ايماق باسشىسى ناريمان تورەعاليەۆ تەمىرجولشىلاردى ايتۋلى داتامەن، ءوڭىر جۇرتشىلىعىن ۆوكزالدىڭ اشىلۋىمەن قۇتتىقتادى. پرەزيدەنت قاسىم-جومارت توقاەۆتىڭ ەلىمىزدىڭ كولىك-لوگيستيكالىق ينفراقۇرىلىمىن جاڭعىرتۋ جونىندەگى تاپسىرماسى اياسىندا «قازاقستان تەمىر جولى» ۇلتتىق كومپانياسىنىڭ تاپسىرىسىمەن وڭىردەگى 4 تەمىرجول ۆوكزالىن قايتا جاڭارتۋ جۇمىستارى ءساتتى جۇزەگە اسىرىلعانىن اتاپ ءوتتى.
- شىڭعىرلاۋ، تاسقالا اۋداندارىندا تەمىرجول ۆوكزالدارى باستان-اياق بۇزىلىپ جاڭادان سالىندى. اقساي قالاسى مەن وبلىس ورتالىعىنداعى نىساندار قايتا جاڭعىرتىلدى. بۇل ماقساتقا رەسپۋبليكالىق جانە جەرگىلىكتى بيۋدجەت ەسەبىنەن 7,6 ملرد تەڭگە جۇمسالدى. وسىلايشا مەملەكەت باسشىسىنىڭ تاپسىرماسى تولىق ورىندالدى. ءسان-سالتاناتى كەلىسكەن عيمارات قۇرىلىسىن ساپالى ءارى مەرزىمىندە اياقتاعان مەردىگەر كومپانيا ۇجىمىنا وبلىس جۇرتشىلىعى اتىنان ريزاشىلىعىمدى بىلدىرەمىن! حالىق جاڭا نىساننىڭ يگىلىگىن ۇزاق ۋاقىت كورەتىنىنە سەنىم مول، - دەدى ناريمان تورەعاليەۆ.
شارادا تەمىرجولشىلار مەن قۇرىلىسشىلار كولىك ءمينيسترى مەن ايماق باسشىسىنىڭ العىس حاتتارىنا يە بولدى.
جاڭعىرعان نىساندا جولاۋشىلاردىڭ قولايلىلىعى ءۇشىن 4 ەسكالاتور، 3 جەدەلساتى ورناتىلىپ، زاماناۋي كونكورستىق وتكەل سالىندى. انا مەن بالا، قوناقۇي بولمەلەرى، سونداي-اق ەرەكشە قاجەتتىلىگى بار ازاماتتار ءۇشىن دە ءتيىستى جاعداي قاراستىرىلدى. ۆوكزالداعى بارلىق ينجەنەرلىك ينفراقۇرىلىم جەلىلەرى جاڭارتىلدى. جەرگىلىكتى بيۋدجەت ەسەبىنەن عيماراتقا ىرگەلەس اۋماق اباتتاندىرىلدى.
ايتا كەتەيىك، ورال تەمىرجول ۆوكزالى ارقىلى 1 حالىقارالىق، 3 وبلىسارالىق جانە 2 وبلىسىشىلىك تۇراقتى جولاۋشىلار تاسىمالى جۇزەگە اسىرىلادى. جاڭا عيمارات ارقىلى تاۋلىگىنە 1800 جولاۋشى جانە 7 جۇپ پويىز قاتىنايدى.
