Temırjol kölıgı qyzmetkerlerınıŋ käsıbi merekesı qarsaŋynda kürdelı jöndeuden ötken Oral temırjol vokzaly paidalanuǧa berıldı.
Saltanatty ıs-şaraǧa oblys äkımı Nariman Töreǧaliev, QR Kölık ministrı Nūrlan Sauranbaev, «Qazaqstan temır joly» ūlttyq kompaniiasynyŋ qūrylys jönındegı basqaruşy direktory Marat Esqaliev, sala qyzmetkerlerı men ardagerlerı, öŋır tūrǧyndary men qonaqtary qatysty.
Aimaq basşysy Nariman Töreǧaliev temırjolşylardy aituly datamen, öŋır jūrtşylyǧyn vokzaldyŋ aşyluymen qūttyqtady. Prezident Qasym-Jomart Toqaevtyŋ elımızdıŋ kölık-logistikalyq infraqūrylymyn jaŋǧyrtu jönındegı tapsyrmasy aiasynda «Qazaqstan temır joly» ūlttyq kompaniiasynyŋ tapsyrysymen öŋırdegı 4 temırjol vokzalyn qaita jaŋartu jūmystary sättı jüzege asyrylǧanyn atap öttı.
- Şyŋǧyrlau, Tasqala audandarynda temırjol vokzaldary bastan-aiaq būzylyp jaŋadan salyndy. Aqsai qalasy men oblys ortalyǧyndaǧy nysandar qaita jaŋǧyrtyldy. Būl maqsatqa respublikalyq jäne jergılıktı biudjet esebınen 7,6 mlrd teŋge jūmsaldy. Osylaişa Memleket basşysynyŋ tapsyrmasy tolyq oryndaldy. Sän-saltanaty kelısken ǧimarat qūrylysyn sapaly ärı merzımınde aiaqtaǧan merdıger kompaniia ūjymyna oblys jūrtşylyǧy atynan rizaşylyǧymdy bıldıremın! Halyq jaŋa nysannyŋ igılıgın ūzaq uaqyt köretınıne senım mol, - dedı Nariman Töreǧaliev.
Şarada temırjolşylar men qūrylysşylar Kölık ministrı men aimaq basşysynyŋ alǧys hattaryna ie boldy.
Jaŋǧyrǧan nysanda jolauşylardyŋ qolailylyǧy üşın 4 eskalator, 3 jedelsaty ornatylyp, zamanaui konkorstyq ötkel salyndy. Ana men bala, qonaqüi bölmelerı, sondai-aq erekşe qajettılıgı bar azamattar üşın de tiıstı jaǧdai qarastyryldy. Vokzaldaǧy barlyq injenerlık infraqūrylym jelılerı jaŋartyldy. Jergılıktı biudjet esebınen ǧimaratqa ırgeles aumaq abattandyryldy.
Aita keteiık, Oral temırjol vokzaly arqyly 1 halyqaralyq, 3 oblysaralyq jäne 2 oblysışılık tūraqty jolauşylar tasymaly jüzege asyrylady. Jaŋa ǧimarat arqyly täulıgıne 1800 jolauşy jäne 7 jūp poiyz qatynaidy.
