ورال قالاسىندا ەرەسەكتەر، جاستار جانە يۋنيورلار اراسىندا ساداق اتۋدان قازاقستان رەسپۋبليكاسىنىڭ چەمپيوناتىنىڭ سالتاناتتى اشىلۋ ءراسىمى ءوتتى. 26 شىلدە مەن 1 تامىز ارالىعىندا ۇيىمداستىرىلىپ جاتقان ەل بىرىنشىلىگىنە قازاقستاننىڭ تۇكپىر-تۇكپىرىنەن كەلگەن ۇزدىك ساداقشىلار قاتىسۋدا.
بايراقتى باسەكەدە استانا، الماتى، شىمكەنت قالالارى مەن اقمولا، الماتى، جەتىسۋ، پاۆلودار، تۇركىستان، قاراعاندى جانە باتىس قازاقستان وبلىستارىنان كەلگەن 260 سپورتشى ءوزارا مىقتىنى انىقتايدى.
چەمپيوناتتىڭ باستى ماقساتى – سپورتشىلاردىڭ شەبەرلىك دەڭگەيىن ارتتىرۋ، حالىقارالىق ارەنادا ەل نامىسىن قورعايتىن ۇزدىك مەرگەندەردى انىقتاۋ جانە ازيا ويىندارى، الەم جانە ازيا چەمپيوناتتارى، الەم كۋبوگى كەزەڭدەرى مەن وليمپيادا ويىندارىنا قاتىساتىن قازاقستان رەسپۋبليكاسى ۇلتتىق قۇراماسىنا ۇمىتكەرلەردى ىرىكتەۋ.
سالتاناتتى اشىلۋ راسىمىنە باتىس قازاقستان وبلىسى دەنە شىنىقتىرۋ جانە سپورت باسقارماسىنىڭ باسشىسى باقداۋلەت ءسابيتوۆ، قازاقستان رەسپۋبليكاسى ۇلتتىق ساداق اتۋ فەدەراتسياسىنىڭ پرەزيدەنتى ازامات ۇسىمبەكوۆ جانە باتىس قازاقستان وبلىسى ساداق اتۋ فەدەراتسياسىنىڭ پرەزيدەنتى نۇرلان اقنۇروۆ قاتىستى.
قۇرمەتتى قوناقتار سپورتشىلارعا ساتتىلىك تىلەپ، چەمپيوناتتىڭ جوعارى دەڭگەيدە وتەتىنىنە سەنىم ءبىلدىردى. سونىمەن قاتار، ساداق اتۋ سپورتىن دامىتۋعا ۇلەس قوسقان بىرقاتار ازاماتتار ماراپاتتالدى.
اشىلۋ سالتاناتى ءوڭىر ونەرپازدارىنىڭ كونتسەرتتىك باعدارلاماسىمەن ارلەنىپ، مەرەكەلىك وتشاشۋمەن اياقتالدى. كەشتىڭ ەرەكشە ءساتى – ساداقشىلاردىڭ ءتۇرلى ءتۇستى جەبەلەرمەن كورسەتكەن اسەرلى قويىلىمى كورەرمەندەردىڭ زور ىقىلاسىنا بولەندى.
چەمپيونات بىرنەشە كۇن بويى جالعاسىپ، ەلىمىزدىڭ ۇزدىك مەرگەندەرى چەمپيوندىق اتاق پەن قازاقستان رەسپۋبليكاسى ۇلتتىق قۇراماسىنا جولداما ءۇشىن باق سىنايدى.
چەمپيونات باعدارلاماسى
28 شىلدە – كۆاليفيكاتسيالىق جارىستار (09:00–18:00)
29 شىلدە – بارلىق ساناتتار بويىنشا فينالعا دەيىنگى كوماندالىق جارىستار (09:00–16:00)
30 شىلدە – وليمپيادالىق اينالىم (جەكەلەي سايىس) (09:00–17:00)
31 شىلدە – بارلىق ساناتتار بويىنشا فينالدىق جارىستار (09:00–18:00)
چەمپيونات قورىتىندىسى بويىنشا جەڭىمپازدار انىقتالىپ، حالىقارالىق جارىستارعا قاتىساتىن ۇلتتىق قۇرامانىڭ رەزەرۆى جاساقتالادى.
