ورال قالاسىندا 96 جاستاعى تىل ارداگەرى ساندەش جاپاشەۆا جەڭىس كۇنىنە ارنالعان قۇتتىقتاۋ مەن 50 مىڭ تەڭگە كولەمىندەگى بىرجولعى تولەمدى الا الماي قالعان، دەپ حابارلايدى "ادىرنا" ۇلتتىق پورتالى كتك ارناسىنا سىلتەمە جاساپ.
مالىمەتكە سايكەس، زەينەتكەر ەلەكتروندى بازادان جوعالىپ كەتىپ، تىركەۋدەن دە شىعىپ قالعان. ساندەش جاپاشەۆا ۇزاق جىلدار مەكتەپ ديرەكتورى بولىپ قىزمەت اتقارعان. ول ەڭبەك قىزىل تۋ وردەنىمەن ماراپاتتالعان، ءبىلىم بەرۋ ءىسىنىڭ ۇزدىگى جانە قازاق كسر جوعارعى كەڭەسىنىڭ بۇرىنعى دەپۋتاتى بولعان. ارداگەردىڭ تۋىستارى ءمان-جايدى انىقتاۋ ءۇشىن ازاماتتارعا ارنالعان ۇكىمەت مەملەكەتتىك كورپوراتسياسىنىڭ حالىققا قىزمەت كورسەتۋ ورتالىعىنا جۇگىنگەن. ماماندار بۇل جاعدايدى تەحنيكالىق اقاۋمەن بايلانىستىرعان.
تۋىستارىنىڭ ايتۋىنشا، ارداگەردىڭ مەرەكەدە نازاردان تىس قالۋى وعان اۋىر تيگەن.
ء«بىز ءۇشىن بۇل 50 مىڭ تەڭگە ماڭىزدى ەمەس. ماسەلە – اجەمىزدى ەشكىم كەلىپ قۇتتىقتاماعانىندا. سوعان قاتتى كوڭىلى ءتۇسىپ كەتتى»، – دەدى نەمەرەسى ەرنار الدەكەشەۆ.
ال تولەمگە جاۋاپتى مەكەمە وكىلدەرى بۇعان دەيىن تىزىمدەر بۋحگالتەريا ارقىلى جاسالسا، قازىر مەملەكەتتىك اقپاراتتىق جۇيەلەردەگى دەرەكتەر نەگىزىندە قالىپتاستىرىلاتىنىن مالىمدەدى. الايدا ساندەش جاپاشەۆانىڭ ەسىمى جۇيەدەن تابىلماعان.
قالا اكىمدىگىنىڭ مالىمەتىنشە، ارداگەردىڭ تىركەۋى 9 مامىردان كەيىن عانا قايتا راسىمدەلگەن. سونىڭ سالدارىنان ول مەرەكەلىك تولەم الۋشىلار تىزىمىنە ەنبەي قالعان.
