ورال قالاسىندا قازاقستان رەسپۋبليكاسى پرەزيدەنتىنىڭ تەلەراديوكەشەنى ۇيىمداستىرعان «حرونيكادان بولاشاققا» رەسپۋبليكالىق كينولەكتوريى ءوز جۇمىسىن باستادى. پرەزيدەنت تەلەراديوكەشەنىنىڭ 30 جىلدىعىنا ارنالعان اۋقىمدى اعارتۋشىلىق جوبا ەلىمىزدىڭ وڭىرلەرىن ارالاپ، 19–20 ماۋسىم كۇندەرى باتىس قازاقستان وبلىسىندا وتۋدە.
وتاندىق دەرەكتى كينونى ناسيحاتتاۋعا جانە تاريحي جادىنى ساقتاۋعا باعىتتالعان شاراعا وبلىس تۇرعىندارى، جاستار، مادەنيەت سالاسىنىڭ وكىلدەرى مەن قوعام بەلسەندىلەرى قاتىستى. ەكى كۇن بويى كورەرمەندەرگە پرەزيدەنت تەلەراديوكەشەنىنىڭ دەرەكتى كينو ورتالىعى تۇسىرگەن قازاقستاننىڭ زاماناۋي تاريحىن، قوعامداعى ماڭىزدى وزگەرىستەردى جانە ادام تاعدىرلارىن باياندايتىن ۇزدىك دەرەكتى فيلمدەر ۇسىنىلادى.
كينولەكتوريدىڭ اشىلۋ سالتاناتىندا باتىس قازاقستان وبلىسى اكىمدىگى اپپاراتىنىڭ باسشىسى ءنۇردىلدا وراز قۇتتىقتاۋ ءسوز سويلەپ، جوبانىڭ ءوڭىر ءۇشىن ماڭىزدىلىعىنا توقتالدى.
– بۇگىن باتىس قازاقستان وبلىسى ءۇشىن، ورال قالاسى ءۇشىن ەرەكشە كۇن. ءبىز قازاقستان رەسپۋبليكاسى پرەزيدەنتى تەلەراديوكەشەنىنىڭ 30 جىلدىعى اياسىندا ۇيىمداستىرىلعان «حرونيكادان بولاشاققا» رەسپۋبليكالىق كينولەكتوريىن ءوز تورىمىزدە قارسى الىپ وتىرمىز. بۇل اۋقىمدى اعارتۋشىلىق جوبا ەلوردامىز استانادان باستاۋ الىپ، بۇگىندە ءبىزدىڭ وڭىرگە جەتتى. مۇنداي باستامانىڭ ءبىر بولىگى بولۋ ءبىز ءۇشىن ۇلكەن مارتەبە. ويتكەنى بۇل جوبا تاۋەلسىز قازاقستاننىڭ ماڭىزدى كەزەڭدەرىن دارىپتەپ، ۇلتتىق جادىمىزدى ساقتاۋعا قىزمەت ەتەدى، – دەدى ءنۇردىلدا وراز.
ونىڭ ايتۋىنشا، پرەزيدەنت تەلەراديوكەشەنى وتىز جىل بويى ەلىمىزدىڭ قوعامدىق-ساياسي ومىرىندەگى ماڭىزدى وقيعالاردى، مەملەكەتتىك رەفورمالاردى، حالىقارالىق باستامالاردى جانە قاراپايىم ازاماتتاردىڭ تاعدىرىن بەينەلەيتىن بىرەگەي ۆيزۋالدى شەجىرە قالىپتاستىرىپ كەلەدى.
فيلم كورسەتىلىمدەرى باستالماس بۇرىن پرەزيدەنت تەلەراديوكەشەنى دەرەكتى كينو ورتالىعىنىڭ باس پروديۋسەرى ادىلبەك قۇلامان ءسوز سويلەپ، كينولەكتوريدىڭ نەگىزگى ماقساتى تۋرالى ايتتى.
– دەرەكتى كينو – ۋاقىتتىڭ ايناسى. ول ەلىمىزدىڭ تاريحىندا ءىز قالدىرعان ماڭىزدى وقيعالار مەن تۇلعالاردى كەيىنگى ۇرپاققا جەتكىزەدى. بۇل جوبا ارقىلى ءوڭىر تۇرعىندارى دەرەكتى كينو ورتالىعىنىڭ ۇزدىك تۋىندىلارىن كورىپ قانا قويماي، ولاردىڭ اۆتورلارىمەن تىكەلەي پىكىر الماسۋعا مۇمكىندىك الادى. ءبىز ءۇشىن فيلمدەردىڭ كورەرمەن جۇرەگىنەن ورىن تاۋىپ، وي سالۋى ماڭىزدى، – دەدى ادىلبەك قۇلامان.
كينولەكتوريدىڭ العاشقى كۇنى كورەرمەن نازارىنا «سەرت» جانە «ARAL» دەرەكتى فيلمدەرى ۇسىنىلدى.
«سەرت» ءفيلمى 2024 جىلدىڭ كوكتەمىندە ەلىمىزدىڭ بىرنەشە وڭىرىندە، سونىڭ ىشىندە باتىس قازاقستان وبلىسىندا ورىن العان ءىرى سۋ تاسقىنىنىڭ سالدارىن باياندايدى. تۋىندىدا اپاتتىڭ كۋاگەرلەرى مەن زارداپتارىن جويۋعا قاتىسقان ازاماتتاردىڭ وقيعالارى ارقىلى قيىن كەزەڭدەگى حالىقتىڭ بىرلىگى مەن جاناشىرلىعى كورسەتىلەدى.
ال «ARAL» دەرەكتى فيلمىندە ءومىرىن ارال تەڭىزىندەگى بالىق شارۋاشىلىعىنا ارناعان كۇنتۋعان تۇرعىنباەۆتىڭ تاعدىرى باياندالادى. فيلم ارقىلى كورەرمەندەر ارال ءوڭىرىنىڭ تاريحىمەن، ەكولوگيالىق ماسەلەلەرىمەن جانە سول وڭىردە ءومىر ءسۇرىپ جاتقان ادامداردىڭ تاعدىرىمەن تانىسادى.
ورال قالاسىنىڭ تۇرعىنى ءاليا سماعۇلوۆا كورگەن فيلمدەردەن العان اسەرىمەن ءبولىستى.
– ماعان اسىرەسە «سەرت» ءفيلمى قاتتى اسەر ەتتى. سەبەبى سۋ تاسقىنى ءبىزدىڭ ءوڭىردىڭ كوپتەگەن تۇرعىندارىنا تىكەلەي اسەر ەتتى. وسىنداي دەرەكتى فيلمدەر باستان وتكەن وقيعالاردى جاڭاشا تۇسىنۋگە مۇمكىندىك بەرەدى، – دەدى ول.
كينولەكتوري ورال قالاسىندا ەرتەڭ، 20 ماۋسىم كۇنى دە جالعاسادى. ەكىنشى كۇنى كورەرمەندەر ەلىمىزدىڭ تۋريستىك الەۋەتىن تانىستىراتىن «TRAVEL KAZAKHSTAN» جانە كاسپي تەڭىزىندەگى قۇلالى ارالىندا ۇزاق جىلدار قىزمەت ەتكەن پەتر لۋپەنكوۆتىڭ ءومىرى تۋرالى باياندايتىن «چەلوۆەك س وستروۆا كۋلالى» دەرەكتى فيلمدەرىن تاماشالاي الادى.
ايتا كەتەيىك، «حرونيكادان بولاشاققا» رەسپۋبليكالىق كينولەكتوريى پرەزيدەنت تەلەراديوكەشەنىنىڭ 30 جىلدىعىنا وراي ۇيىمداستىرىلىپ وتىر. جوبا قازاقستاننىڭ 20 قالاسىن قامتىپ، قىركۇيەك ايىندا الماتى قالاسىندا قورىتىندىلانادى. ونىڭ نەگىزگى ماقساتى – وتاندىق دەرەكتى كينونى كەڭىنەن ناسيحاتتاپ، تاۋەلسىز قازاقستاننىڭ كورنەكى تاريحىن كەلەر ۇرپاققا جەتكىزۋ.
