اقمولا وبلىسىندا تەمىرجول ينفراقۇرىلىمىن جاڭعىرتۋ جۇمىستارى جالعاسۋدا. وسى باعىتتاعى ماڭىزدى جوبالاردىڭ ءبىرى رەتىندە ارشالى اۋدانى مەن سارىوبا ستانتسياسىندا كۇردەلى رەكونسترۋكتسيادان وتكەن تەمىرجول ۆوكزالدارى سالتاناتتى تۇردە پايدالانۋعا بەرىلدى، دەپ حابارلايدى وڭىرلىك كوممۋنيكاتسيالار قىزمەتى.
ارشالى اۋدانىنداعى ۆوكزال عيماراتى العاش رەت 1945 جىلى سالىنعان بولاتىن. ۋاقىت تالابىنا ساي نىسان تولىقتاي جاڭعىرتىلىپ، ەسكى عيمارات ىرگەتاسىنا دەيىن بۇزىلىپ، ونىڭ ورنىنا زاماناۋي تالاپتارعا ساي جاڭا ۆوكزال بوي كوتەردى. جاڭا عيماراتتىڭ اۋماعى بۇرىنعىدان 80 شارشى مەترگە كەڭەيىپ، جولاۋشىلارعا ارنالعان كۇتۋ زالى ايتارلىقتاي ۇلعايتىلدى.
جوبا جەتەكشىسى بەكزات تولەستىڭ ايتۋىنشا، ۆوكزالدا جولاۋشىلاردىڭ جايلىلىعى مەن قاۋىپسىزدىگىنە ەرەكشە كوڭىل بولىنگەن.
– عيمارات تولىقتاي جاڭادان سالىندى. انا مەن بالا بولمەسى، مۇمكىندىگى شەكتەۋلى ازاماتتارعا ارنالعان كۇتۋ بولمەسى مەن سانيتارلىق توراپ قاراستىرىلعان. زاماناۋي ينجەنەرلىك جۇيەلەرمەن جابدىقتالعان ۆوكزال بارلىق قازىرگى ستاندارتتارعا تولىق سايكەس كەلەدى. جولاۋشىلار لەگى كوپ بولماسا دا، تۇرعىندار ءۇشىن بارلىق قولايلى جاعداي جاسالدى، – دەدى ول.
جاڭارتىلعان ۆوكزالدىڭ اشىلۋىنا قاتىسقان ارشالى تۇرعىنى سىمبات تولەسوۆا بۇل نىساننىڭ اۋىل تۇرعىندارى ءۇشىن ماڭىزدى ەكەنىن اتاپ ءوتتى.
– مەن بۇل جەردە بالا كەزىمنەن تۇرامىن. بۇرىنعى ۆوكزالمەن دە تالاي جىل پايدالاندىق. قازىرگى جاڭا عيمارات وتە ادەمى ءارى جايلى. اسىرەسە ۇلكەن كىسىلەر مەن بالالارعا بارلىق جاعدايدىڭ جاسالعانى قۋانتادى. پاندۋستار، انا مەن بالا بولمەسى، زاماناۋي جابدىقتاردىڭ بولۋى – تۇرعىندار ءۇشىن ۇلكەن مۇمكىندىك، – دەدى ول.
سول كۇنى سارىوبا ستانتسياسىندا دا تولىقتاي جاڭارتىلعان تەمىرجول ۆوكزالى پايدالانۋعا بەرىلدى. بۇرىنعى ۆوكزال 1938 جىلى سالىنعان. عيماراتتىڭ تەحنيكالىق جاعدايى سىن كوتەرمەيتىن دەڭگەيگە جەتكەندىكتەن، ونى تولىقتاي بۇزىپ، ورنىنا جاڭا ۆوكزال سالۋ تۋرالى شەشىم قابىلدانعان.
«Integra Construction» جشس اقمولا وبلىستىق فيليالىنىڭ ديرەكتورى ارمان نۇرمۇقانوۆتىڭ ايتۋىنشا، قۇرىلىس بارىسىندا ەسكى عيماراتپەن بىرگە ينجەنەرلىك جەلىلەر دە تولىق اۋىستىرىلعان.
– جاڭا ۆوكزال قاۋىپسىزدىك تالاپتارىنا تولىق سايكەس كەلەدى. مۇندا مۇمكىندىگى شەكتەۋلى جاندارعا ارنالعان بولمەلەر، انا مەن بالا بولمەسى، ارنايى سانيتارلىق توراپ قاراستىرىلعان. زاماناۋي جەلدەتۋ، كونديتسيونەرلەۋ جانە ءورت قاۋىپسىزدىگى جۇيەلەرى ورناتىلدى. سونىمەن قاتار ەنەرگيا ۇنەمدەيتىن ۆيتراجدار قولدانىلىپ، پەرروننىڭ 400 مەترلىك جاعالاۋ پلاتفورماسى جاڭارتىلدى. نىسان تولىقتاي تاكتيلدى ناۆيگاتسيامەن جابدىقتالعان، – دەدى ول.
سارىوبا ستانتسياسىنىڭ تۇرعىنى، تەمىرجول سالاسىنىڭ ارداگەرى سەرىكباي ءابجانوۆ بۇل كۇندى كوپتەن كۇتكەن قۋانىشتى ءسات دەپ باعالادى.
– مەن وسى جەردە 1965 جىلدان بەرى تۇرامىن، بۇكىل ەڭبەك جولىم تەمىرجولمەن بايلانىستى. وسى ۆوكزالدان اسكەرگە اتتاندىق، جاقىندارىمىزدى قارسى الىپ، شىعارىپ سالدىق. سوندىقتان بۇل ورىننىڭ ءار تۇرعىن ءۇشىن ورنى بولەك. بۇگىن جاڭا، زاماناۋي ۆوكزالدىڭ اشىلعانىن كورۋ – ۇلكەن قۋانىش. قۇرىلىسشىلار مەن تەمىرجول سالاسىنىڭ ماماندارىنا العىس ايتامىن. ەلدى مەكەندەردىڭ وسىلاي كوركەيىپ جاتقانىن كورۋ ەرەكشە اسەر سىيلايدى، – دەدى ارداگەر.
جاڭارتىلعان ارشالى جانە سارىوبا ۆوكزالدارى ءوڭىر تۇرعىندارىنا قولايلى ءارى قاۋىپسىز قىزمەت كورسەتۋگە باعىتتالعان. زاماناۋي ينفراقۇرىلىممەن جابدىقتالعان نىساندار جولاۋشىلاردىڭ ساپالى قىزمەت الۋىنا مۇمكىندىك بەرىپ، تەمىرجول كولىگى سالاسىنىڭ دامۋىنا جاڭا سەرپىن بەرەدى.
