Aqmola oblysynda temırjol infraqūrylymyn jaŋǧyrtu jūmystary jalǧasuda. Osy baǧyttaǧy maŋyzdy jobalardyŋ bırı retınde Arşaly audany men Saryoba stansiiasynda kürdelı rekonstruksiiadan ötken temırjol vokzaldary saltanatty türde paidalanuǧa berıldı, dep habarlaidy Öŋırlık kommunikasiialar qyzmetı.
Arşaly audanyndaǧy vokzal ǧimaraty alǧaş ret 1945 jyly salynǧan bolatyn. Uaqyt talabyna sai nysan tolyqtai jaŋǧyrtylyp, eskı ǧimarat ırgetasyna deiın būzylyp, onyŋ ornyna zamanaui talaptarǧa sai jaŋa vokzal boi köterdı. Jaŋa ǧimarattyŋ aumaǧy būrynǧydan 80 şarşy metrge keŋeiıp, jolauşylarǧa arnalǧan kütu zaly aitarlyqtai ūlǧaityldy.
Joba jetekşısı Bekzat Tölestıŋ aituynşa, vokzalda jolauşylardyŋ jailylyǧy men qauıpsızdıgıne erekşe köŋıl bölıngen.
– Ǧimarat tolyqtai jaŋadan salyndy. Ana men bala bölmesı, mümkındıgı şekteulı azamattarǧa arnalǧan kütu bölmesı men sanitarlyq torap qarastyrylǧan. Zamanaui injenerlık jüielermen jabdyqtalǧan vokzal barlyq qazırgı standarttarǧa tolyq säikes keledı. Jolauşylar legı köp bolmasa da, tūrǧyndar üşın barlyq qolaily jaǧdai jasaldy, – dedı ol.
Jaŋartylǧan vokzaldyŋ aşyluyna qatysqan Arşaly tūrǧyny Symbat Tölesova būl nysannyŋ auyl tūrǧyndary üşın maŋyzdy ekenın atap öttı.
– Men būl jerde bala kezımnen tūramyn. Būrynǧy vokzalmen de talai jyl paidalandyq. Qazırgı jaŋa ǧimarat öte ädemı ärı jaily. Äsırese ülken kısıler men balalarǧa barlyq jaǧdaidyŋ jasalǧany quantady. Pandustar, ana men bala bölmesı, zamanaui jabdyqtardyŋ boluy – tūrǧyndar üşın ülken mümkındık, – dedı ol.
Sol künı Saryoba stansiiasynda da tolyqtai jaŋartylǧan temırjol vokzaly paidalanuǧa berıldı. Būrynǧy vokzal 1938 jyly salynǧan. Ǧimarattyŋ tehnikalyq jaǧdaiy syn kötermeitın deŋgeige jetkendıkten, ony tolyqtai būzyp, ornyna jaŋa vokzal salu turaly şeşım qabyldanǧan.
«Integra Construction» JŞS Aqmola oblystyq filialynyŋ direktory Arman Nūrmūqanovtyŋ aituynşa, qūrylys barysynda eskı ǧimaratpen bırge injenerlık jelıler de tolyq auystyrylǧan.
– Jaŋa vokzal qauıpsızdık talaptaryna tolyq säikes keledı. Mūnda mümkındıgı şekteulı jandarǧa arnalǧan bölmeler, ana men bala bölmesı, arnaiy sanitarlyq torap qarastyrylǧan. Zamanaui jeldetu, kondisionerleu jäne ört qauıpsızdıgı jüielerı ornatyldy. Sonymen qatar energiia ünemdeitın vitrajdar qoldanylyp, perronnyŋ 400 metrlık jaǧalau platformasy jaŋartyldy. Nysan tolyqtai taktildı navigasiiamen jabdyqtalǧan, – dedı ol.
Saryoba stansiiasynyŋ tūrǧyny, temırjol salasynyŋ ardagerı Serıkbai Äbjanov būl kündı köpten kütken quanyşty sät dep baǧalady.
– Men osy jerde 1965 jyldan berı tūramyn, bükıl eŋbek jolym temırjolmen bailanysty. Osy vokzaldan äskerge attandyq, jaqyndarymyzdy qarsy alyp, şyǧaryp saldyq. Sondyqtan būl orynnyŋ är tūrǧyn üşın orny bölek. Bügın jaŋa, zamanaui vokzaldyŋ aşylǧanyn köru – ülken quanyş. Qūrylysşylar men temırjol salasynyŋ mamandaryna alǧys aitamyn. Eldı mekenderdıŋ osylai körkeiıp jatqanyn köru erekşe äser syilaidy, – dedı ardager.
Jaŋartylǧan Arşaly jäne Saryoba vokzaldary öŋır tūrǧyndaryna qolaily ärı qauıpsız qyzmet körsetuge baǧyttalǧan. Zamanaui infraqūrylymmen jabdyqtalǧan nysandar jolauşylardyŋ sapaly qyzmet aluyna mümkındık berıp, temırjol kölıgı salasynyŋ damuyna jaŋa serpın beredı.
