اقش ۆيتسە-پرەزيدەنتى دجەي دي ۆەنس رەسپۋبليكالىق پارتيانىڭ ارالىق سايلاۋداعى ءىرى جەڭىلىسىنە قاتىستى پىكىر ءبىلدىرىپ، بۇعان يرانمەن سوعىستىڭ سەبەپ بولعانىن مالىمدەدى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
ء«بىزدىڭ جەڭىلىسىمىزگە سەبەپ بولعان – سوعىس. نەلىكتەن جەڭىلگەنىمىزدى ءبارى بىلەدى. الداعى ۋاقىتتا قانداي باعىت ۇستانۋ كەرەكتىگى تۋرالى كەز كەلگەن اشىق اڭگىمە وسى ماسەلەدەن باستالۋى ءتيىس»، – دەپ جازدى ول.
دونالد ترامپ تا سايلاۋدان كەيىنگى ءتۇنى رەسپۋبليكاشىلداردىڭ جەڭىلىسىنە ءوزى اقپان ايىندا باستاعان يرانمەن سوعىستىڭ بەلگىلى ءبىر دەڭگەيدە اسەر ەتكەنىن مويىندادى.
ساۋالناما ناتيجەلەرى كورسەتكەندەي، بۇل سوعىس اقش قوعامى اراسىندا شىنىمەن دە قولداۋ تاپپاي وتىر. اسىرەسە اسكەري قاقتىعىس سالدارىنان بەنزين، ديزەل وتىنى جانە كۇندەلىكتى تۇتىناتىن باسقا دا تاۋارلاردىڭ باعاسى قىمباتتاعان.
سايلاۋ كۇنى داۋىس بەرۋ ۋچاسكەلەرىنەن شىققان ازاماتتار اراسىندا جۇرگىزىلگەن ساۋالناماعا قاتىسقانداردىڭ 63 پايىزى اسكەري وپەراتسيالاردى باستاۋ تۋرالى شەشىمدى قاتە دەپ ساناعان. ال رەسپوندەنتتەردىڭ تورتتەن ءۇش بولىگى، ياعني 74 پايىزى، سوعىس كىمگە داۋىس بەرۋ تۋرالى شەشىم قابىلداۋدا ماڭىزدى فاكتور بولعانىن ايتقان.
دجەي دي ۆەنس ءوز جازباسىندا رەسپۋبليكاشىلداردىڭ جەڭىلىسىنە اسەر ەتكەن وزگە دە سەبەپتەردى اتادى. ونىڭ پىكىرىنشە، ولاردىڭ قاتارىندا اقش اكىمشىلىگىنىڭ يزرايلمەن قارىم-قاتىناسى دا بار. سونداي-اق ول امەريكالىقتاردىڭ ترامپتىڭ كوشى-قون ساياساتىنا كوڭىلى تولمايتىنىنا دا توقتالدى. ۆەنس بۇل ساياساتتى وزگەرتۋ ماسەلەسىن تالقىلاۋعا دايىن ەكەنىن ايتىپ، زاڭسىز ميگرانتتاردى جۇمىسقا الاتىن كومپانيالارعا باسىمدىق بەرىپ، سولارعا قاتىستى شارالاردى كۇشەيتۋدى ۇسىندى.
بۇعان دەيىن امەريكالىق بۇقارالىق اقپارات قۇرالدارىندا ۆەنستىڭ يرانمەن سوعىستى اسا قولداي قويمايتىنى تۋرالى اقپاراتتار جاريالانعان ەدى. سونىمەن قاتار ول يرانمەن جۇرگىزىلگەن كەلىسسوزدەرگە بەلسەندى قاتىسقان. الايدا ۆيتسە-پرەزيدەنت پەن ونىڭ وكىلدەرى كوپشىلىك الدىنداعى مالىمدەمەلەرىندە پرەزيدەنتتىڭ ۇستانىمىنا قايشى كەلمەۋگە تىرىساتىنىن ۇنەمى اتاپ وتكەن.
دجەي دي ۆەنس 2028 جىلعى پرەزيدەنت سايلاۋىندا رەسپۋبليكالىق پارتيا اتىنان ءتۇسۋى مۇمكىن ۇمىتكەرلەردىڭ ءبىرى سانالادى. «The New York Times» پەن Siena College بىرلەسىپ 12–19 قازان ارالىعىندا جۇرگىزگەن ساۋالنامادا رەسپۋبليكالىق پارتيانىڭ پرايمەريزىنە قاتىسۋعا نيەتتى ازاماتتاردان كىمگە داۋىس بەرەتىنى سۇرالعان. رەسپوندەنتتەردىڭ باسىم بولىگى، ياعني 36 پايىزى، دجەي دي ۆەنستى قولدايتىنىن ايتقان. ەكىنشى ورىندا قازىرگى اقش مەملەكەتتىك حاتشىسى ماركو رۋبيو تۇر.
