قىرعىزستان پرەزيدەنتى سادىر جاپاروۆ ەلدە جالاقىنى مىندەتتى تۇردە يندەكستەۋ تۋرالى زاڭعا قول قويدى. ەندى تاۋارلار مەن قىزمەتتەر باعاسىنىڭ وسۋىنە بايلانىستى ازاماتتاردىڭ تابىسى دا ارتىپ وتىرادى. بۇل تۋرالى Kaktus.media جازدى، دەپ حابارلايدى «ادىرنا» ءتىلشىسى.
جاڭا زاڭعا سايكەس، جۇمىس بەرۋشىلەر ازاماتتاردىڭ تابىسى قۇنسىزدانباۋى ءۇشىن باعانىڭ وسۋىنە قاراي جالاقىنى كوتەرۋگە مىندەتتى. يندەكستەۋ ءتارتىبى ۇجىمدىق شارتتاردا، كەلىسىمدەردە نەمەسە ۇيىمداردىڭ ىشكى نورماتيۆتىك قۇجاتتارىندا بەلگىلەنەدى.
Banks.kg مالىمەتىنشە، قىرعىزستاندا جالاقىنى مىندەتتى يندەكستەۋ تالابى بۇرىن دا بولعان. الايدا 2025 جىلى جاڭا ەڭبەك كودەكسى قابىلدانعاننان كەيىن بۇل نورما زاڭنان الىنىپ تاستالعان. سونىڭ سالدارىنان ازاماتتاردىڭ ءادىل ەڭبەكاقى الۋعا قاتىستى قۇقىعى ساقتالعانىمەن، باعانىڭ ءوسۋىن وتەۋگە ارنالعان ناقتى تەتىك زاڭنامادا قاراستىرىلماي قالعان.
جوگوركۋ كەنەش دەپۋتاتتارى مىندەتتى يندەكستەۋدى قايتا ەنگىزۋ قاجەتتىگىن اقشانىڭ قۇنسىزدانۋىمەن ءتۇسىندىردى. اتاپ ايتقاندا، 2022–2024 جىلدارى ەلدەگى جيىنتىق ينفلياتسيا دەڭگەيى 28 پايىزدان اسقان. سونىڭ سالدارىنان جالاقىسى تۇراقتى تۇردە قايتا قارالماعان ازاماتتاردىڭ ساتىپ الۋ قابىلەتى تومەندەگەن.
ەڭبەك كودەكسىنىڭ 91-بابىنا ەنگىزىلگەن تۇزەتۋلەر وسى ولقىلىقتىڭ ورنىن تولتىرادى. الايدا جالاقى مولشەرى بارلىق قىزمەتكەر ءۇشىن بىردەي ءارى اۆتوماتتى تۇردە وسپەيدى.
قوسىمشا تولەمنىڭ مولشەرى مەن ونى ەسەپتەۋ ءتارتىبى جۇمىس سالاسىنا بايلانىستى بولادى. بيۋدجەتتىك سالا قىزمەتكەرلەرى ءۇشىن ءتيىستى ەرەجەلەردى ۇكىمەت ازىرلەيدى. ال جەكە سەكتوردا يندەكستەۋ مولشەرى مەن مەرزىمدىلىگى جۇمىس بەرۋشىلەر مەن قىزمەتكەرلەر اراسىنداعى ىشكى كەلىسىمدەر مەن شارتتاردا بەلگىلەنەدى.
