قۇرىلتاي دەپۋتاتتارى مەن قازاقستان حالىق كەڭەسىنىڭ مۇشەلەرى شىعىس قازاقستان وبلىسىنىڭ قالالارى مەن اۋداندارىندا تۇرعىندارمەن كەزدەسۋلەر وتكىزۋدە.
گلۋبوكوە اۋدانىندا قۇرىلتاي دەپۋتاتى ەرلان سايروۆ، قازاقستان حالىق كەڭەسىنىڭ مۇشەسى دەنيس رىپاكوۆ جانە قر ۇلتتىق ەكونوميكا ۆيتسە-ءمينيسترى ارمان كاسەنوۆ اۋدان اكتيۆىمەن كەزدەستى. ال ريددەر قالاسىنا جۇمىس ساپارىمەن قۇرىلتاي دەپۋتاتتارى ولجاس نۋرالدينوۆ پەن جۇلدىز دانباەۆا، قر كولىك ۆيتسە-ءمينيسترى ماقسات قالياقپاروۆ، دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسى باۋىرجان ءجۇسىپوۆ جانە قر ەنەرگەتيكا ۆيتسە-ءمينيسترى ەرجان ەرتاەۆ كەلدى.
كەزدەسۋلەر بارىسىندا «قازاقستاننىڭ جاڭا تاريحي كەزەڭدەگى وزەكتى مىندەتتەرى» اتتى پرەزيدەنت جولداۋىنىڭ ىسكە اسىرىلۋى جانە ءوڭىردىڭ الەۋمەتتىك-ەكونوميكالىق دامۋىنا قاتىستى ماسەلەلەر تالقىلاندى.
— شىعىس قازاقستان بۇگىندە قارقىندى دامىپ كەلەدى. ءتورت جاڭا اۋدان قۇرىلدى، ەكى اۋەجايدىڭ قۇرىلىسى جۇرگىزىلۋدە، ەلىمىزدەگى ەڭ بيىك كوپىر پايدالانۋعا بەرىلدى، بىرەگەي گەماتولوگيا ورتالىعى جۇمىسىن باستادى، وبلىس ورتالىعىندا كولىك ايرىعى سالىنۋدا. بۇل جوبالار ءوڭىردىڭ XXI عاسىرداعى ەكونوميكالىق ۇردىستەرگە ساي تۋريستىك، كولىك جانە تسيفرلىق حابقا اينالۋىنا مۇمكىندىك بەرەدى، — دەدى ەرلان سايروۆ.
كەزدەسۋ بارىسىندا ەكونوميكانى دامىتۋ، ينفراقۇرىلىمدى جاڭعىرتۋ جانە حالىقتىڭ ءومىر ءسۇرۋ ساپاسىن ارتتىرۋ ماسەلەلەرى قارالدى. دەپۋتاتتىڭ ايتۋىنشا، الداعى ءۇش جىلدا الەۋمەتتىك ينفراقۇرىلىمدى دامىتۋعا 6,5 ترلن تەڭگە باعىتتالىپ، 70 دەنساۋلىق ساقتاۋ نىسانى جانە ءبىلىم بەرۋ، مادەنيەت پەن سپورت سالالارىندا 50 نىسان سالۋ جوسپارلانىپ وتىر.
اۋدان تۇرعىندارى ەلدى مەكەندەردە مەديتسينالىق پۋنكتتەردىڭ تاپشىلىعى ماسەلەسىن كوتەردى.
— بۇل ماسەلەنى دەنساۋلىق ساقتاۋ مينيسترلىگىمەن بىرلەسىپ قاراستىرۋ قاجەت. جاڭا مەديتسينالىق پۋنكتتەر سالۋمەن قاتار، قولدانىستاعى نىسانداردى جاڭعىرتۋ كەرەك. الەۋمەتتىك ينفراقۇرىلىمدى حالىقتىڭ قاجەتتىلىكتەرىن ەسكەرە وتىرىپ، وزىق قارقىنمەن دامىتۋ ماڭىزدى، — دەپ اتاپ ءوتتى ەرلان سايروۆ.
قازاقستان حالىق كەڭەسىنىڭ مۇشەسى دەنيس رىپاكوۆ ماسەلەلەردى كوتەرۋمەن قاتار، ولاردىڭ شەشۋ جولدارىن ىزدەستىرۋدىڭ ماڭىزدىلىعىنا توقتالدى. وزەكتى ماسەلەلەر قاتارىندا كوممۋنالدىق جانە الەۋمەتتىك ينفراقۇرىلىمدى جاڭعىرتۋ، اۋىلداردى دامىتۋ جانە جاستارعا قولايلى جاعداي جاساۋ بار.
— گلۋبوكوە اۋدانىنىڭ ونەركاسىپتىك، اۋىل شارۋاشىلىعى جانە ادامي الەۋەتى زور. سونىمەن قاتار كوممۋنالدىق ينفراقۇرىلىمنىڭ جاي-كۇيى تۇراقتى نازار اۋدارۋدى تالاپ ەتەدى، — دەدى دەنيس رىپاكوۆ.
ول جىلۋمەن تۇراقتى قامتاماسىز ەتۋ، جولداردى جوندەۋ، كوشەلەردى جارىقتاندىرۋ، اۋىلداردى اباتتاندىرۋ جانە ساپالى اۋىزسۋمەن قامتۋ ماسەلەلەرىنىڭ ماڭىزدىلىعىن اتاپ ءوتتى.
ريددەر قالاسىندا ونەركاسىپتىك الەۋەت پەن قالالىق ينفراقۇرىلىمدى دامىتۋعا ەرەكشە نازار اۋدارىلدى. ولجاس نۋرالدينوۆ قالانىڭ ءوڭىر مەن ەل ەكونوميكاسىنا ەلەۋلى ۇلەس قوسىپ وتىرعان ماڭىزدى ونەركاسىپتىك ورتالىق ەكەنىن اتاپ ءوتتى.
— ريددەر دامىپ كەلەدى، تاۋ شاڭعىسى بازالارى سالىنىپ، ينفراقۇرىلىم جەتىلدىرىلۋدە. تاۋ-كەن ونەركاسىبى بۇرىنعىسىنشا ماڭىزدى ءرول اتقارادى. سونىمەن قاتار جىلۋ ەلەكتر ورتالىعىن جاڭعىرتۋ جۇمىستارىن جەدەلدەتىپ، قالالىق ينفراقۇرىلىمدى رەتكە كەلتىرۋ قاجەت، — دەدى دەپۋتات.
ول سونداي-اق پرەزيدەنت جولداۋىندا كوزدەلگەن الەۋمەتتىك جانە ينفراقۇرىلىمدىق باستامالار تۋرالى باياندادى.
مەديتسينا سالاسىندا كوپ جىلدىق تاجىريبەسى بار قۇرىلتاي دەپۋتاتى جۇلدىز دانباەۆا دەنساۋلىق ساقتاۋ جۇيەسىن دامىتۋ ماسەلەسىنە توقتالدى. ريددەردە جاقىندا 200 ورىندىق اۋرۋحانا مەن اۋىسىمىنا 500 ادام قابىلدايتىن ەمحانا اشىلعانىمەن، مەديتسينالىق كادرلاردىڭ تاپشىلىعى وزەكتى ماسەلە بولىپ وتىر.
— باستى مىندەتتەردىڭ ءبىرى — مەديتسينا قىزمەتكەرلەرىنىڭ جالاقىسىن 40 پايىزعا ارتتىرۋ. سونىمەن قاتار پەريناتالدىق ورتالىقتار مەن قالالىق اۋرۋحانالار سالۋ جوسپارلانۋدا. ەلىمىزدە جىل سايىن 330 مىڭ بالا دۇنيەگە كەلەتىنىن ەسكەرسەك، پەريناتالدىق ينفراقۇرىلىمدى دامىتۋ ايرىقشا ماڭىزدى، — دەپ اتاپ ءوتتى جۇلدىز دانباەۆا.
قر كولىك ۆيتسە-ءمينيسترى ماقسات قالياقپاروۆ 2026 جىلعى 28 قازانداعى پرەزيدەنت جولداۋىندا كولىك سالاسىن دامىتۋعا قاتىستى بەلگىلەنگەن مىندەتتەر تۋرالى ايتتى. باسىم باعىتتار قاتارىندا جولداردىڭ ساپاسىن ارتتىرۋ، لوگيستيكانى دامىتۋ، وتاندىق تاسىمالداۋشىلاردى قولداۋ، وتكىزۋ پۋنكتتەرىن جاڭعىرتۋ جانە قىزمەتتەردى تسيفرلاندىرۋ بار.
— قازاقستان ەۋرازيانىڭ تولىققاندى كولىك-لوگيستيكالىق ورتالىعىنا اينالۋى ءتيىس. ول ءۇشىن حالىقارالىق كولىك دالىزدەرىن دامىتىپ، ىشكى جانە وڭىرلىك ينفراقۇرىلىمدى جەتىلدىرۋ قاجەت، — دەپ اتاپ ءوتتى ماقسات قالياقپاروۆ.
ريددەر تۇرعىندارى وسكەمەنمەن كولىك قاتىناسىنا قاتىستى دا سۇراقتار قويدى. ۆيتسە-مينيستر بۇل ماسەلەلەردى ءتيىستى مەردىگەر ۇيىمدارعا جەتكىزۋگە ۋادە بەردى.
بۇدان بولەك، ولجاس نۋرالدينوۆ كاسىپكەرلىكتى قولداۋ شارالارى تۋرالى ايتىپ، كەلەسى جىلدان باستاپ شاعىن جانە ميكروبيزنەس ءۇشىن ءۇش جىلدىق موراتوري ەنگىزۋ جوسپارلانىپ وتىرعانىن جەتكىزدى.
گلۋبوكوە اۋدانىندا جانە ريددەر قالاسىندا وتكەن كەزدەسۋلەر الەۋمەتتىك جانە كوممۋنالدىق ينفراقۇرىلىمدى دامىتۋدان باستاپ، ونەركاسىپ پەن كاسىپكەرلىكتى قولداۋعا دەيىنگى كەڭ اۋقىمدى ماسەلەلەردى قامتىدى. تۇرعىندارمەن اشىق ديالوگ وزەكتى ماسەلەلەردى ايقىنداپ، مەملەكەت باسشىسى قويعان مىندەتتەردى ىسكە اسىرۋدىڭ الداعى باعىتتارىن بەلگىلەۋگە مۇمكىندىك بەردى.
