Qūryltai deputattary men Qazaqstan Halyq Keŋesınıŋ müşelerı Şyǧys Qazaqstan oblysynyŋ qalalary men audandarynda tūrǧyndarmen kezdesuler ötkızude.
Glubokoe audanynda Qūryltai deputaty Erlan Sairov, Qazaqstan Halyq Keŋesınıŋ müşesı Denis Rypakov jäne QR Ūlttyq ekonomika vise-ministrı Arman Kasenov audan aktivımen kezdestı. Al Ridder qalasyna jūmys saparymen Qūryltai deputattary Oljas Nuraldinov pen Jūldyz Danbaeva, QR Kölık vise-ministrı Maqsat Qaliaqparov, Densaulyq saqtau ministrlıgı Medisinalyq jäne farmasevtikalyq baqylau komitetınıŋ töraǧasy Bauyrjan Jüsıpov jäne QR Energetika vise-ministrı Erjan Ertaev keldı.
Kezdesuler barysynda «Qazaqstannyŋ jaŋa tarihi kezeŋdegı özektı mındetterı» atty Prezident Joldauynyŋ ıske asyryluy jäne öŋırdıŋ äleumettık-ekonomikalyq damuyna qatysty mäseleler talqylandy.
— Şyǧys Qazaqstan bügınde qarqyndy damyp keledı. Tört jaŋa audan qūryldy, ekı äuejaidyŋ qūrylysy jürgızılude, elımızdegı eŋ biık köpır paidalanuǧa berıldı, bıregei gematologiia ortalyǧy jūmysyn bastady, oblys ortalyǧynda kölık airyǧy salynuda. Būl jobalar öŋırdıŋ XXI ǧasyrdaǧy ekonomikalyq ürdısterge sai turistık, kölık jäne sifrlyq habqa ainaluyna mümkındık beredı, — dedı Erlan Sairov.
Kezdesu barysynda ekonomikany damytu, infraqūrylymdy jaŋǧyrtu jäne halyqtyŋ ömır süru sapasyn arttyru mäselelerı qaraldy. Deputattyŋ aituynşa, aldaǧy üş jylda äleumettık infraqūrylymdy damytuǧa 6,5 trln teŋge baǧyttalyp, 70 densaulyq saqtau nysany jäne bılım beru, mädeniet pen sport salalarynda 50 nysan salu josparlanyp otyr.
Audan tūrǧyndary eldı mekenderde medisinalyq punktterdıŋ tapşylyǧy mäselesın köterdı.
— Būl mäselenı Densaulyq saqtau ministrlıgımen bırlesıp qarastyru qajet. Jaŋa medisinalyq punktter salumen qatar, qoldanystaǧy nysandardy jaŋǧyrtu kerek. Äleumettık infraqūrylymdy halyqtyŋ qajettılıkterın eskere otyryp, ozyq qarqynmen damytu maŋyzdy, — dep atap öttı Erlan Sairov.
Qazaqstan Halyq Keŋesınıŋ müşesı Denis Rypakov mäselelerdı köterumen qatar, olardyŋ şeşu joldaryn ızdestırudıŋ maŋyzdylyǧyna toqtaldy. Özektı mäseleler qatarynda kommunaldyq jäne äleumettık infraqūrylymdy jaŋǧyrtu, auyldardy damytu jäne jastarǧa qolaily jaǧdai jasau bar.
— Glubokoe audanynyŋ önerkäsıptık, auyl şaruaşylyǧy jäne adami äleuetı zor. Sonymen qatar kommunaldyq infraqūrylymnyŋ jai-küiı tūraqty nazar audarudy talap etedı, — dedı Denis Rypakov.
Ol jylumen tūraqty qamtamasyz etu, joldardy jöndeu, köşelerdı jaryqtandyru, auyldardy abattandyru jäne sapaly auyzsumen qamtu mäselelerınıŋ maŋyzdylyǧyn atap öttı.
Ridder qalasynda önerkäsıptık äleuet pen qalalyq infraqūrylymdy damytuǧa erekşe nazar audaryldy. Oljas Nuraldinov qalanyŋ öŋır men el ekonomikasyna eleulı üles qosyp otyrǧan maŋyzdy önerkäsıptık ortalyq ekenın atap öttı.
— Ridder damyp keledı, tau şaŋǧysy bazalary salynyp, infraqūrylym jetıldırılude. Tau-ken önerkäsıbı būrynǧysynşa maŋyzdy röl atqarady. Sonymen qatar jylu elektr ortalyǧyn jaŋǧyrtu jūmystaryn jedeldetıp, qalalyq infraqūrylymdy retke keltıru qajet, — dedı deputat.
Ol sondai-aq Prezident Joldauynda közdelgen äleumettık jäne infraqūrylymdyq bastamalar turaly baiandady.
Medisina salasynda köp jyldyq täjıribesı bar Qūryltai deputaty Jūldyz Danbaeva densaulyq saqtau jüiesın damytu mäselesıne toqtaldy. Ridderde jaqynda 200 oryndyq auruhana men auysymyna 500 adam qabyldaityn emhana aşylǧanymen, medisinalyq kadrlardyŋ tapşylyǧy özektı mäsele bolyp otyr.
— Basty mındetterdıŋ bırı — medisina qyzmetkerlerınıŋ jalaqysyn 40 paiyzǧa arttyru. Sonymen qatar perinataldyq ortalyqtar men qalalyq auruhanalar salu josparlanuda. Elımızde jyl saiyn 330 myŋ bala düniege keletının eskersek, perinataldyq infraqūrylymdy damytu airyqşa maŋyzdy, — dep atap öttı Jūldyz Danbaeva.
QR Kölık vise-ministrı Maqsat Qaliaqparov 2026 jylǧy 28 qazandaǧy Prezident Joldauynda kölık salasyn damytuǧa qatysty belgılengen mındetter turaly aitty. Basym baǧyttar qatarynda joldardyŋ sapasyn arttyru, logistikany damytu, otandyq tasymaldauşylardy qoldau, ötkızu punktterın jaŋǧyrtu jäne qyzmetterdı sifrlandyru bar.
— Qazaqstan Euraziianyŋ tolyqqandy kölık-logistikalyq ortalyǧyna ainaluy tiıs. Ol üşın halyqaralyq kölık dälızderın damytyp, ışkı jäne öŋırlık infraqūrylymdy jetıldıru qajet, — dep atap öttı Maqsat Qaliaqparov.
Ridder tūrǧyndary Öskemenmen kölık qatynasyna qatysty da sūraqtar qoidy. Vise-ministr būl mäselelerdı tiıstı merdıger ūiymdarǧa jetkızuge uäde berdı.
Būdan bölek, Oljas Nuraldinov käsıpkerlıktı qoldau şaralary turaly aityp, kelesı jyldan bastap şaǧyn jäne mikrobiznes üşın üş jyldyq moratorii engızu josparlanyp otyrǧanyn jetkızdı.
Glubokoe audanynda jäne Ridder qalasynda ötken kezdesuler äleumettık jäne kommunaldyq infraqūrylymdy damytudan bastap, önerkäsıp pen käsıpkerlıktı qoldauǧa deiıngı keŋ auqymdy mäselelerdı qamtydy. Tūrǧyndarmen aşyq dialog özektı mäselelerdı aiqyndap, Memleket basşysy qoiǧan mındetterdı ıske asyrudyŋ aldaǧy baǧyttaryn belgıleuge mümkındık berdı.
