ۇلىتاۋ وبلىسى، ۇلىتاۋ اۋدانىنداعى №123 سايلاۋ ۋچاسكەسىندە كەلۋشىلەردى ەرەكشە كەيىپكەر – ۇلىتاۋدىڭ تابيعي بولمىسىن بەينەلەيتىن «ۇلار» قۇسى قارسى الدى. ەرەكشە فورمات سايلاۋ كۇنىنە وزىندىك سيپات بەرىپ، ۋچاسكەگە كەلگەن تۇرعىندارعا كوتەرىڭكى كوڭىل كۇي سىيلادى. «ۇلار» بەينەسىندەگى انيماتور ازاماتتاردى جىلى قارسى الىپ، كەلۋشىلەرمەن ەستەلىك سۋرەتتەرگە ءتۇستى.
ۇلار بەينەسىنىڭ تاڭدالۋىنىڭ وزىندىك ءمانى بار. ۇلار – ۇلىتاۋدىڭ تابيعي ەرەكشەلىگى مەن رۋحاني بولمىسىن ساباقتاستىراتىن سيمۆول. بيىك تاۋلاردى مەكەندەيتىن بۇل قۇس اسقاقتىقتى، ەركىندىكتى، توزىمدىلىك پەن ومىرشەڭدىكتى بەينەلەيدى. ال ۇلىتاۋ – قازاق تاريحىنداعى ەلدىك پەن بىرلىكتىڭ، ۇلتتىق رۋح پەن مەملەكەتتىلىكتىڭ ماڭىزدى نىشاندارىنىڭ ءبىرى.
وسى تۇرعىدان العاندا، №123 سايلاۋ ۋچاسكەسىندەگى «ۇلار» بەينەسى جاي عانا ەرەكشە وبراز ەمەس، ۇلىتاۋدىڭ تابيعاتى مەن تاريحىن زاماناۋي فورماتتا تانىتاتىن سيمۆولدىق شەشىم بولدى. ۇلاردىڭ بيىككە ۇمتىلعان بولمىسى ءوڭىردىڭ بولاشاققا دەگەن سەنىمىمەن، ال ونىڭ تۋعان تابيعاتىمەن ەتەنە بايلانىسى ۇلىتاۋعا دەگەن سۇيىسپەنشىلىكپەن ۇندەسەدى.
ۇلار – تابيعاتتا سيرەك كەزدەسەتىن، تاۋلى ايماقتاردى مەكەندەيتىن ەرەكشە قۇستاردىڭ ءبىرى. ونىڭ تابيعي ورتاعا بەيىمدىلىگى، بيىك تاۋلاردى مەكەن ەتۋى ۇلىتاۋدىڭ تابيعي لاندشافتىمەن تىعىز ساباقتاس. سيرەك كەزدەسەتىن قۇستاردىڭ قاتارىنداعى ۇلاردى قورعاۋ – ءوڭىردىڭ بيوالۋاندىعىن ساقتاۋداعى ماڭىزدى باعىتتارىنىڭ ءبىرى. سوندىقتان «ۇلار» بەينەسىن تاڭداۋ ارقىلى ۇلىتاۋدىڭ تابيعي بايلىعىن دارىپتەۋ عانا ەمەس، تابيعاتتى ايالاۋ مەن قورشاعان ورتاعا جاۋاپكەرشىلىكپەن قاراۋ قۇندىلىعى دا ناسيحاتتالدى.
