پرەزيدەنت قاسىم-جومارت توقاەۆ بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ تۋرالى جارلىققا قول قويدى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«بارلىق دەڭگەيدەگى ءماسليحاتتاردىڭ وكىلەتتىگى مەرزىمىنەن بۇرىن توقتاتىلسىن. قازاقستان رەسپۋبليكاسىنىڭ ورتالىق سايلاۋ كوميسسياسى بارلىق دەڭگەيدەگى ءماسليحاتتار دەپۋتاتتارىن كەزەكتەن تىس سايلاۋدى تاعايىنداۋ، ونى دايىنداۋ مەن وتكىزۋدى ۇيىمداستىرۋ جونىندەگى شارالاردى قابىلداسىن.
قازاقستان رەسپۋبليكاسىنىڭ ۇكىمەتى، استانا قالاسىنىڭ، وبلىستاردىڭ، الماتى جانە شىمكەنت قالالارىنىڭ اكىمدەرى بارلىق دەڭگەيدەگى ءماسليحاتتار دەپۋتاتتارىن كەزەكتەن تىس سايلاۋدى ۇيىمداستىرۋشىلىق، ماتەريالدىق-تەحنيكالىق جانە قارجىلىق قامتاماسىز ەتۋ جونىندەگى شارالاردى قابىلداسىن. وسى جارلىق جاريالانعان كۇنىنەن باستاپ قولدانىسقا ەنگىزىلەدى»،– دەلىنگەن حابارلامادا.
بۇعان دەيىن پرەزيدەنت پرەمەرمەن جانە قۇرىلتاي توراعاسىمەن كەڭەسكەن ەدى.
