6 قىركۇيەك ساعات 11:27 شاماسىندا شىعىس قازاقستان وبلىسىندا قايعىلى جول اپاتى بولدى، دەپ حابارلايدى "ادىرنا" ءتىلشىسى.
شىعىس قازاقستان وبلىسىندا ۇلان اۋدانىندا وسكەمەن-الماتى تاس جولىنىڭ 45 شاقىرىمىندا جول-كولىك وقيعاسى بولدى.
Toyota Ipsum اۆتوكولىگىنىڭ 24 جاستاعى جۇرگىزۋشىسى ءرولدى باسقارا الماي، الدىندا كەلە جاتقان كامازبەن سوقتىعىستى. جول-كولىك وقيعاسى سالدارىنان كولىكتەگى 38 جانە 44 جاستاعى ەكى جولاۋشى ءتۇرلى دەنە جاراقات الىپ، وقيعا ورنىندا قايتىس بولدى.
اتالعان ءاۆتوموبيلدىڭ 24 جاستاعى جۇرگىزۋشىسى، 40 جانە 20 جاستاعى ەكى جولاۋشىسى مەديتسينالىق مەكەمەگە جاتقىزىلدى. اتالعان فاكتى بويىنشا قر قك-ءنىڭ 345-بابى 4-بولىگى بويىنشا (كولىك قۇرالدارىن باسقاراتىن ادامداردىڭ ابايسىزدا ەكى جانە ودان دا كوپ ادامنىڭ ولىمىنە اكەپ سوققان جول قوزعالىسى ەرەجەلەرىن بۇزۋى) بويىنشا سوتقا دەيىنگى تەرگەۋ باستالدى. قازىرگى ۋاقىتتا سوتقا دەيىنگى تەرگەۋ بويىنشا بىرقاتار سوت ساراپتامالارى تاعايىندالدى، ولاردىڭ ناتيجەلەرى بويىنشا پروتسەسسۋالدىق شەشىم قابىلداناتىن بولادى.
