اباي وبلىسىندا دەمالىستان اسكەري بولىمگە بارا جاتقان سارباز بەن ونىڭ اتا-اناسى جول اپاتىنان قازا تاپتى. بۇل تۋرالى قازاقستان قۇرلىق اسكەرلەرىنىڭ ءباسپاسوز قىزمەتى ايتتى، دەپ حابارلايدى ادىرنا» ءتىلشىسى.
قايعىلى وقيعا 28 ماۋسىم كۇنى اباي وبلىسى، اياگوز قالاسىنىڭ ماڭىندا، وسكەمەن — الماتى تاسجولىندا بولعان.
«قۇرلىق اسكەرلەرىنىڭ قولباسشىلىعى 2025 جىلعى 28 ماۋسىمدا اياگوز گارنيزونىنداعى اسكەري بولىمدەردىڭ ءبىرىنىڭ مەرزىمدى اسكەري قىزمەتكەرى جانە ونى سەيىلدەمەدەن اسكەري بولىمگە الىپ بارا جاتقان اتا-اناسى جول اپاتى سالدارىنان قازا تاپقانىن زور كۇيزەلىسپەن جەتكىزەدى»، - دەلىنگەن حابارلامادا.
اباي وبلىسى پوليتسيا دەپارتامەنتىنىڭ مالىمەتىنشە،
«الدىن الا مالىمەت بويىنشا، Toyota Lumiere كولىگىنىڭ 62 جاستاعى جۇرگىزۋشىسى قارسى باعىتقا شىعىپ كەتىپ، قارسى كەلە جاتقان Toyota Land Cruiser اۆتوكولىگىمەن سوقتىعىسقان. جول-كولىك وقيعاسى سالدارىنان Toyota Lumiere جۇرگىزۋشىسى مەن ءۇش جولاۋشىسى وقيعا ورنىندا كوز جۇمدى. اتالعان فاكتى بويىنشا سوتقا دەيىنگى تەرگەۋ باستالدى. قاجەتتى تەرگەۋ ارەكەتتەرى جۇرگىزىلىپ جاتىر، سوت-مەديتسينالىق ساراپتامالار تاعايىندالدى»،—دەپ تولىقتىردى پد ءباسپاسوز قىزمەتى.
قۇرلىق اسكەرلەرىنىڭ قولباسشىلىعى قازا تاپقانداردىڭ تۋىستارى مەن جاقىندارىنا قايعىرا كوڭىل ايتىپ، ءتيىستى كومەك كورسەتىلەتىنىن جەتكىزدى.
