اقتاۋ قالاسىندا كولىك جۇرگىزۋ كۋالىگى جوق ماس جىگىت ءىرى جول اپاتىن تۋدىردى. سالدارىنان ءتورت بىردەي اۆتوكولىك زاقىمدانىپ، تەمىر تۇلپارلار تىزبەكتى رەاكتسيا ارقىلى ءبىر-بىرىنە سوعىلعان، دەپ حابارلايدى “ادىرنا” پورتالى Lada.kz باسىلىمىنا سىلتەمە جاساپ.
جول-كولىك وقيعاسى 10 قاڭتار كۇنى كەشكە اقتاۋدىڭ 8-شاعىناۋدانىندا بولعان. 26 جاستاعى جۇرگىزۋشى تىزگىندەگەن Haval Jolion كولىگى جول جيەگىندە تۇرعان كولىكتەردى بىرىنەن سوڭ ءبىرىن ءىلىپ كەتكەن.
الدىمەن Haval Jolion تۇراقتا تۇرعان Toyota RAV4 كولىگىنە سوعىلعان. سوققى سالدارىنان Toyota الدىنداعى Kia Ceed كولىگىن يتەرىپ جىبەرگەن. ال Kia ءوز كەزەگىندە Mercedes-Benz اۆتوكولىگىنە بارىپ سوعىلعان. تىزبەكتى اپاتتان كەيىن ءتارتىپ بۇزۋشى توقتاماي، بالالار ويىن الاڭىنىڭ قورشاۋىن دا قيراتىپ وتكەن.
وقيعا ورنىنا جەتكەن پوليتسيا قىزمەتكەرلەرى زاڭ بۇزۋشىنى بىردەن ۇستاپ، ناركولوگ ماماندارعا تەكسەرۋگە جىبەردى.
«مەديتسينالىق كۋالاندىرۋ ناتيجەسىندە 26 جاستاعى ازاماتتىڭ جەڭىل دارەجەدە ماس بولعانى انىقتالدى. سونداي-اق، ونىڭ كولىك جۇرگىزۋگە ەشقانداي قۇقىعى جوق ەكەنى، ياعني جۇرگىزۋشى كۋالىگىن الماعانى بەلگىلى بولدى»، — دەلىنگەن پوليتسيا مالىمەتىندە.
جول اپاتى سالدارىنان ەشكىم زارداپ شەككەن جوق. تەك كولىك يەلەرىنە ايتارلىقتاي ماتەريالدىق شىعىن كەلدى.
قازىرگى ۋاقىتتا Haval Jolion كولىگى ايىپ تۇراعىنا قويىلدى. ءىس ماتەريالدارى ءتيىستى پروتسەسسۋالدىق شەشىم قابىلداۋ ءۇشىن سوتقا جولداندى.
كىنالى ازاماتتى كولىكتى كۋالىكسىز ءارى ماس كۇيدە باسقارعانى ءۇشىن ىرى كولەمدە ايىپپۇل نەمەسە اكىمشىلىك قاماۋ كۇتىپ تۇر. وعان قوسا، ول بۇلىنگەن ءتورت كولىك پەن ويىن الاڭىنىڭ شىعىنىن ءوز قالتاسىنان وتەۋگە ءتيىس.
