الماتىدا جۇما كۇنى سيان سينحايدىڭ ەسكەرتكىشى مەن وعان ىرگەلەس الاڭنىڭ قايتا قالپىنا كەلتىرىلگەننەن كەيىنگى سالتاناتتى اشىلۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
قازاقستان سىرتقى ىستەر مينيسترلىگىنىڭ الماتى قالاسىنداعى وكىلدىگىنىڭ باسشىسى جانىبەك ءابدراشوۆ قۇتتىقتاۋ سوزىندە سيان سينحاي مەن قازاق كومپوزيتورى باقىتجان بايقاداموۆ اراسىنداعى بەرىك دوستىقتى اتاپ ءوتتى.
«بۇگىن اشىلىپ وتىرعان بۇل ەسكەرتكىش – تەك ۇلى كومپوزيتورعا قويىلعان ەسكەرتكىش ەمەس. بۇل – دوستىقتىڭ، ءوزارا تۇسىنىستىكتىڭ جانە مادەني بىرلىكتىڭ نىشانى. بۇل – قيىن-قىستاۋ كەزەڭدە مۋزىكانىڭ جۇرەكتەردى بىرىكتىرىپ، شەكارالاردان اسىپ، ادامزاتتىڭ ۇنىنە اينالا الاتىنىن ەسكە سالاتىن بەلگى»، – دەدى ج. ءابدراشوۆ.
الماتى قالاسى مادەنيەت باسقارماسى باسشىسىنىڭ ورىنباسارى ارمان حالبەكوۆ ءوز سوزىندە بۇل شارا قازاقستان مەن قىتايدىڭ مادەني ءومىرى ءۇشىن اسا ماڭىزدى ەكەنىن اتاپ ءوتتى.
«قازاقستان مەن قىتاي اراسىنداعى دوستىق قارىم-قاتىناس تەرەڭ تاريحي تامىرعا يە... بۇل تاريحي بايلانىستار بۇگىندە قايتا جاڭعىرىپ جاتىر. بۇل دوستىق تەك ەكونوميكا مەن سەرىكتەستىكتە عانا ەمەس، مادەني بايلانىستاردا دا دامىپ كەلەدى»، – دەدى
قازاقستان مەملەكەتتىك ونەر مۋزەيىنىڭ ديرەكتورى گۇلايىم جۇمابەكوۆا بۇل ەسكەرتكىش تەك مۇسىندىك نىسان عانا ەمەس، ەكى حالىق اراسىنداعى تاريحي جادىنىڭ، ريزاشىلىقتىڭ جانە مادەني بايلانىستىڭ سيمۆولى ەكەنىن ايتتى:
«بۇگىن ءبىز تەك جاڭارتىلعان ەسكەرتكىشتى اشىپ تۇرعان جوقپىز – ءبىز قازاقستان مەن قىتاي اراسىنداعى مادەني بايلانىستىڭ ماڭىزدىلىعىن تاعى دا ايقىنداپ وتىرمىز»، – دەدى گ. جۇمابەكوۆا.
قىتايدىڭ الماتىداعى باس كونسۋلى تسزيان ۆەي سالتاناتتى سوزىندە ەكى ەل اراسىنداعى دوستىق بايلانىستاردى ساقتاۋ مەن نىعايتۋعا شاقىردى.
«سيان سينحاي مەن بايقاداموۆتىڭ مۋزىكاسىنا نەگىزدەلگەن قىتاي مەن قازاقستان اراسىنداعى دوستىقتى بىرگە ساقتاپ، نىعايتايىق. ەكى ەل حالقى اراسىنداعى ءوزارا تۇسىنىستىك پەن جاقىندىقتى ارتتىرا وتىرىپ، قىتاي مەن قازاقستاننىڭ ورتاق تاعدىرى بار قاۋىمداستىعىن بىرگە قۇرايىق»، – دەدى ول.
ەسكەرتكىشتىڭ اشىلۋىنان كەيىن 2019 جىلى جارىق كورگەن «كومپوزيتور» ءفيلمى كورسەتىلدى. بۇل – قىتاي مەن قازاقستان بىرلەسىپ تۇسىرگەن العاشقى كينوتۋىندى، ول 18-ءشى «حۋابياو» كينو جۇلدەسى مەن باسقا دا ماراپاتتارعا يە بولعان.
