سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ پەتروۆكا اۋىلىندا ورنالاسقان الاش زيالىسى ءارى اقىن مىرجاقىپ دۋلاتۇلىنا ارنالعان مەموريالدىق كەشەندەگى وقيعاعا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
الدىن الا مالىمەتتەرگە سايكەس، كەشەننىڭ قۇرىلىسىن ادەبيەتتانۋشى جانە تاريحشى زاڭعار كارىمحان الەۋمەتتىك جەلىدە جاريالاعان فوتوسۋرەتتەردەن كەيىن نازارعا الىندى. وبلىستىق اكىمدىك ءباسپاسوز قىزمەتى حابارلاعانداي، كەشەننىڭ قۇرىلىس جۇمىستارى ادامداردىڭ ءومىرى مەن دەنساۋلىعىنا قاۋىپ تۋدىرۋى مۇمكىن زاڭبۇزۋشىلىقتار انىقتالعاندىقتان ۋاقىتشا توقتاتىلعان.
اكىمنىڭ ايتۋىنشا، مەموريالدى سالۋ ءۇشىن باستاپقىدا رەسمي رۇقسات الىنباعان.
«كەز كەلگەن قۇرىلىس — ول ەسكەرتكىش پە، الدە تۇرعىن ءۇي مە — جوبالىق-سمەتالىق قۇجاتتار راسىمدەلىپ، جەر تىركەلگەننەن كەيىن عانا رۇقسات ەتىلەدى. مۇندا ەشقانداي قۇجات بولماعان. اۋدان اكىمىنەن سۇراعانىمدا، ولار قۇجاتسىز قۇرىلىس توقتاتىلعانىن ايتتى. كاسىپكەر جاۋاپكەرشىلىككە تارتىلدى»، — دەدى عاۋەز نۇرمۇحامبەتوۆ.
اكىم سونداي-اق، بارلىق قاجەتتى قۇجاتتار راسىمدەلگەننەن كەيىن قۇرىلىس جۇمىستارى قايتا جالعاساتىنىن جەتكىزدى.
بۇدان الدىن سولتۇستىك قازاقستان وبلىسى جامبىل اۋدانى پەتروۆكا اۋىلى ماڭىندا ورناتىلعان مىرجاقىپ دۋلاتۇلىنا ارنالعان مەموريالدىق كەشەننىڭ بۇزىلعانى تۋرالى حابار الەۋمەتتىك جەلىلەردە كەڭ تارالىپ، كوپشىلىكتىڭ نارازىلىعىن تۋدىردى. جەلى قولدانۋشىلارى مەن الاشتانۋشى عالىمدار بۇل ارەكەتتى «قاساقانا جاسالعان ۆانداليزم» دەپ باعالاعان. ال كەشەندى تۇرعىزۋعا اتسالىسقان كاسىپكەرلەر جۇمىسقا جەرگىلىكتى اكىمدىك كەدەرگى كەلتىرگەنىن ايتسا، وبلىس اكىمىنىڭ ورىنباسارى كەرىسىنشە، قۇرىلىس رۇقساتسىز باستالعانىن مالىمدەگەن.
مۇنىڭ ءبارى قۇرىلىستى بۇزۋعا ارەكەت بەلگىسى بايقالىپ، سيمۆولدىق ءمانى بار قىران ءمۇسىنى، جارىق شام باعاندارى جانە مەموريالدىق تاقتا زاقىمدالعان سوڭ ايتىلعان. جەلىدە تاراعان اقپاراتتا وبلىس اكىمدىگى «الاش قايراتكەرلەرىنە 28 مەترلىك ەسكەرتكىش ورناتۋعا بولمايدى» دەگەن ءۋاج بىلدىرگەنى ايتىلعان. الايدا بۇل پىكىرگە قاتىستى رەسمي تۇسىنىكتەمە جوق. مۇنداي ارەكەتتىڭ سەبەبى تۇسىنىكسىز ەكەنى، كەشەن تولىق بۇزىلماعانىمەن، ۇلكەن زيان كەلگەنى ايتىلعان بولاتىن.
