Soltüstık Qazaqstan oblysynyŋ äkımı Ǧauez Nūrmūhambetov Petrovka auylynda ornalasqan Alaş ziialysy ärı aqyn Mırjaqyp Dulatūlyna arnalǧan memorialdyq keşendegı oqiǧaǧa qatysty pıkır bıldırdı, dep habarlaidy "Adyrna" ūlttyq portaly.
Aldyn ala mälımetterge säikes, keşennıŋ qūrylysyn ädebiettanuşy jäne tarihşy Zaŋǧar Kärımhan äleumettık jelıde jariialaǧan fotosuretterden keiın nazarǧa alyndy. Oblystyq äkımdık baspasöz qyzmetı habarlaǧandai, keşennıŋ qūrylys jūmystary adamdardyŋ ömırı men densaulyǧyna qauıp tudyruy mümkın zaŋbūzuşylyqtar anyqtalǧandyqtan uaqytşa toqtatylǧan.
Äkımnıŋ aituynşa, memorialdy salu üşın bastapqyda resmi rūqsat alynbaǧan.
«Kez kelgen qūrylys — ol eskertkış pe, älde tūrǧyn üi me — jobalyq-smetalyq qūjattar räsımdelıp, jer tırkelgennen keiın ǧana rūqsat etıledı. Mūnda eşqandai qūjat bolmaǧan. Audan äkımınen sūraǧanymda, olar qūjatsyz qūrylys toqtatylǧanyn aitty. Käsıpker jauapkerşılıkke tartyldy», — dedı Ǧauez Nūrmūhambetov.
Äkım sondai-aq, barlyq qajettı qūjattar räsımdelgennen keiın qūrylys jūmystary qaita jalǧasatynyn jetkızdı.
Būdan aldyn Soltüstık Qazaqstan oblysy Jambyl audany Petrovka auyly maŋynda ornatylǧan Mırjaqyp Dulatūlyna arnalǧan memorialdyq keşennıŋ būzylǧany turaly habar äleumettık jelılerde keŋ taralyp, köpşılıktıŋ narazylyǧyn tudyrdy. Jelı qoldanuşylary men alaştanuşy ǧalymdar būl ärekettı «qasaqana jasalǧan vandalizm» dep baǧalaǧan. Al keşendı tūrǧyzuǧa atsalysqan käsıpkerler jūmysqa jergılıktı äkımdık kedergı keltırgenın aitsa, oblys äkımınıŋ orynbasary kerısınşe, qūrylys rūqsatsyz bastalǧanyn mälımdegen.
Mūnyŋ bärı qūrylysty būzuǧa äreket belgısı baiqalyp, simvoldyq mänı bar qyran müsını, jaryq şam baǧandary jäne memorialdyq taqta zaqymdalǧan soŋ aitylǧan. Jelıde taraǧan aqparatta oblys äkımdıgı «Alaş qairatkerlerıne 28 metrlık eskertkış ornatuǧa bolmaidy» degen uäj bıldırgenı aitylǧan. Alaida būl pıkırge qatysty resmi tüsınıkteme joq. Mūndai ärekettıŋ sebebı tüsınıksız ekenı, keşen tolyq būzylmaǧanymen, ülken ziian kelgenı aitylǧan bolatyn.
