جاسوسپىرىمدەر اراسىنداعى قۇقىق بۇزۋشىلىقپەن كۇرەسىپ قانا قويماي، ونىڭ الدىن الۋ دا اسا ماڭىزدى. شىعىس قازاقستان وبلىسىندا سپورت، شىعارماشىلىق جانە قوعامدىق بەلسەندىلىك كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋدىڭ ءتيىمدى تەتىكتەرىنە اينالىپ كەلەدى.
جۋرناليست الەكساندر كوزاچكوۆ ءوزىنىڭ Telegram-ارناسىندا جاسوسپىرىمدەر اراسىنداعى قىلمىس ماسەلەسىنە نازار اۋدارىپ، شىعىس قازاقستان وبلىسىندا جۇزەگە اسىرىلىپ جاتقان «بىرلىكتە كۇش بار» پروفيلاكتيكالىق جوباسىن ۇلگى رەتىندە اتاپ ءوتتى.
ءوڭىر پروكۋراتۋراسىنىڭ باستاماسىمەن قولعا الىنعان جوبا جاستار اراسىنداعى قۇقىق بۇزۋشىلىقتىڭ الدىن الۋعا، قۇقىقتىق مادەنيەتتى قالىپتاستىرۋعا جانە جاسوسپىرىمدەردىڭ بوس ۋاقىتىن ءتيىمدى ۇيىمداستىرۋعا باعىتتالعان. العاشىندا اۋدان كولەمىندە باستالعان باستاما كەيىن وبلىستىق دەڭگەيدە جالعاسىن تاپتى.
جوبانىڭ نەگىزگى باعىتتارىنىڭ ءبىرى – جاستاردى سپورتقا باۋلۋ جانە ورتاق ماقسات توڭىرەگىنە بىرىكتىرۋ. وسى اياسىندا 8 كوماندا قاتىسقان حوككەي ءتۋرنيرى ۇيىمداستىرىلىپ، ونى 2 مىڭعا جۋىق كورەرمەن تاماشالادى. شاعىن فۋتبول جارىستارىنا 2 200-دەن استام ادام قاتىسسا، ۇستەل تەننيسى تۋرنيرىنە 800-دەن استام ءجاسوسپىرىم تارتىلدى.
سونىمەن قاتار ۇلتتىق سپورت تۇرلەرىنە دە ەرەكشە كوڭىل ءبولىندى. جاستار كوكپار، اسىق اتۋ، بايگە جانە باسقا دا ۇلتتىق ويىندارعا بەلسەندى قاتىستى.
شىعارماشىلىققا جانە زاماناۋي تسيفرلىق باعىتتارعا قىزىعۋشىلىق تانىتاتىن جاسوسپىرىمدەر ءۇشىن «زاڭ جانە مەن» تاقىرىبىندا بايقاۋلار ۇيىمداستىرىلدى. قاتىسۋشىلار بەينەروليكتەر ءتۇسىرىپ، ءتۇرلى چەللەندجدەر وتكىزىپ، الەۋمەتتىك جەلىلەردە زاڭعا قۇرمەتپەن قاراۋ يدەياسىن ناسيحاتتادى.
جالپى، جازعى كەزەڭدە جوبا اياسىنداعى ءتۇرلى ءىس-شارالارعا شىعىس قازاقستاننىڭ 9 مىڭنان استام ءجاسوسپىرىمى قاتىستى.
اتقارىلعان جۇمىستىڭ ناتيجەسى دە بايقالا باستادى. الەكساندر كوزاچكوۆ كەلتىرگەن مالىمەتتەرگە سايكەس، جوبانى جۇزەگە اسىرۋ كەزەڭىندە وڭىردەگى جاسوسپىرىمدەر قىلمىسى 38%-عا، ال بالالارعا قاتىستى قىلمىستار سانى 12%-عا تومەندەگەن.
بۇل كورسەتكىشتەردىڭ ارتىندا سپورتتىق جانە شىعارماشىلىق ءىس-شارالاردى ۇيىمداستىرۋمەن قاتار، وسكەلەڭ ۇرپاقتى قوعامدىق ومىرگە تارتۋ، دۇرىس قۇندىلىقتاردى قالىپتاستىرۋ جانە زاڭعا قۇرمەتپەن قاراۋعا تاربيەلەۋ باعىتىنداعى جۇيەلى جۇمىس تۇر.
«بىرلىكتە كۇش بار» جوباسىنىڭ باستى ماقساتى – جاسوسپىرىمدەرگە جاڭا مۇمكىندىكتەر ۇسىنىپ، ولاردىڭ قابىلەتىن اشۋعا، ورتاق قىزىعۋشىلىقتارى بار دوستار تابۋىنا جانە كۇش-جىگەرىن پايدالى ىسكە باعىتتاۋىنا جاعداي جاساۋ.
شىعىس قازاقستاننىڭ بۇل تاجىريبەسى قۇقىق بۇزۋشىلىقتىڭ الدىن الۋ جۇمىسى قىلمىس جاسالعاننان كەيىن ەمەس، ودان الدەقايدا بۇرىن باستالۋى كەرەكتىگىن كورسەتەدى. بۇل رەتتە اتا-انالاردىڭ، مەملەكەتتىك ورگانداردىڭ، ءبىلىم بەرۋ مەكەمەلەرىنىڭ، قوعام مەن سپورت ۇيىمدارىنىڭ بىرلەسكەن جۇمىسى ەرەكشە ماڭىزدى.
ويتكەنى جاسوسپىرىمگە دەر كەزىندە قولداۋ كورسەتىپ، دۇرىس باعىت-باعدار بەرۋ – كەيىن قۇقىق بۇزۋشىلىقتىڭ سالدارىمەن كۇرەسكەننەن الدەقايدا ءتيىمدى.
