قازاقستاندا ۇلتتىق قورعانىس ۋنيۆەرسيتەتىنەن “ەلباسى” اتاۋى الىنىپ تاستالماق، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ اتاۋى وزگەرمەك.
جاڭا اتاۋ بويىنشا، ۋنيۆەرسيتەت ەندى تەك «قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتى» دەپ اتالاتىن بولادى. بۇل تۋرالى وزگەرىس جوباسى اشىق نورماتيۆتىك قۇقىقتىق اكتىلەر (نقا) پورتالىندا جاريالاندى.
جوبا قر عىلىم جانە جوعارى ءبىلىم مينيسترلىگى دايىنداپ وتىرعان «جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ەرەكشە مارتەبەسى تۋرالى ەرەجەنى بەكىتۋ تۋرالى» ۇكىمەت قاۋلىسىنا ەنگىزىلەتىن وزگەرىستەر اياسىندا ۇسىنىلعان.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ اتاۋىن قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتى دەپ وزگەرىستەر ەنگىزۋ كوزدەلگەن»- دەلىنگەن قۇجاتتا.
قۇجات جوباسى قوعام تالقىلاۋىنا ۇسىنىلدى. تالقىلاۋ مەرزىمى 2025 جىلعى 18 شىلدەگە دەيىن جالعاسادى.
بۇل باستاما العاش رەت 2023 جىلى
2023 جىلدىڭ اقپان ايىندا پرەزيدەنت قاسىم-جومارت توقاەۆ ەكس-پرەزيدەنتتى «ەلباسى» مارتەبەسىنەن ايىرۋ تۋرالى زاڭعا قول قويدى. بۇعان دەيىن نازارباەۆ «قۇرمەتتى سەناتور» مارتەبەسىنەن دە ايىرىلعان بولاتىن.
قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتى – قارۋلى كۇشتەر مەن باسقا دا ارنايى مەملەكەتتىك ورگاندار ءۇشىن جوعارى بۋىنداعى وفيتسەر مامانداردى دايارلايتىن باستى اسكەري جوعارى وقۋ ورنى.
ۋنيۆەرسيتەت 2003 جىلى سول كەزدەگى پرەزيدەنت نۇرسۇلتان نازارباەۆتىڭ جارلىعىمەن اشىلعان.
2018 جىلى ۋنيۆەرسيتەتكە نۇرسۇلتان نازارباەۆتىڭ ەسىمى بەرىلگەن بولاتىن.
2024 جىلعى قاڭتاردا اتالعان ۋنيۆەرسيتەت اۋماعىنداعى 2020 جىلى ورناتىلعان نازارباەۆ ەسكەرتكىشى الىنىپ، قايتا قويىلماعان.
