2025 جىلدىڭ 9 شىلدەسىندە تابيعاتى تاماشا بۋرابايدا شەتەلدە تۇراتىن ەتنيكالىق قازاق بالالارىنا ارنالعان «Jas Qazaq» جازعى تانىمدىق ەتنو-لاگەرىنىڭ رەسمي اشىلۋ سالتاناتى ءوتتى.
ءىس-شارانى قازاقستان رەسپۋبليكاسى سىرتقى ىستەر مينيسترلىگىنە قاراستى «وتانداستار قورى» ۇيىمداستىردى.
لاگەر IQanat High School of Burabay بازاسىندا ءوتىپ جاتىر. بۇل — تەك دەمالىس ەمەس، تاريحي وتانىنا العاش رەت كەلگەن بالالار ءۇشىن ەرەكشە رۋحاني تاجىريبە.
لاگەرگە اقش، تۇركيا، پولشا، وزبەكستان، موڭعوليا، قىتاي، رەسەي، قىرعىزستان، ءباا سەكىلدى 10-نان استام ەلدەن كەلگەن 130-عا جۋىق ەتنيكالىق قازاق بالاسى قاتىسىپ وتىر. ولار — ءتۇرلى ءبىلىم جانە شىعارماشىلىق بايقاۋلاردا ۇزدىك تانىلعان دارىندى جاستار.
«Jas Qazaq» لاگەرى بيىل بەسىنشى رەت وتكىزىلىپ وتىر. بۇعان دەيىنگى ماۋسىمداردا 700-دەن استام شەتەلدەگى قازاق بالالارى قاتىسقان. كەيبىرى كەيىن اتاجۇرتىنا كوشىپ كەلىپ، ەلىمىزدىڭ جوعارى وقۋ ورىندارىندا ءبىلىم الۋدى تاڭداعان.
تانىم مەن تاربيە قاتار جۇرەتىن باعدارلاما
7–20 شىلدە ارالىعىندا وتەتىن لاگەردىڭ باعدارلاماسى مازمۇندى ءارى تاربيەلىك مانگە تولى. لاگەر قاتىسۋشىلارى قازاق ءتىلى مەن قازاقستان تاريحى ساباقتارىنا قاتىسادى; كيىز ءۇي قۇرۋ، اتقا ءمىنۋ، ۇلتتىق ويىندار، دومبىرا تارتۋ سىندى ءداستۇرلى تاجىريبەلەردى مەڭگەرەدى; جوو-لار ۇيىمداستىرعان ءبىلىم كورمەسىنە قاتىسىپ، بولاشاق ءبىلىم جولىن
لاگەر قاتىسۋشىلارىنىڭ جۇزىنەن قۋانىش، سوزىنەن شىنايى تولقىنىس بايقالادى. بىرنەشە بالا ءوز اسەرىمەن ءبولىستى:
بايمۇرات ءىلياس، تۇركيا:
«لاگەردە ءىشىڭ پىسپايدى. كۇنى بويى ءتۇرلى ءىس-شارا وتەدى. قازاق ءتىلى مەن تاريحىن ۇيرەنىپ، ءتىلىمدى دامىتىپ جاتىرمىن».
قالىبەكوۆا ماقبيرا، وزبەكستان:
«قازاقستاننىڭ تابيعاتى وتە ادەمى. وسىندا تۇرۋ – مەنىڭ ارمانىم».
نۇربانۋ سەرىك، پولشا:
«مەكتەپ وتە تازا ءارى زاماناۋي. مۇنداعى بالالارمەن تەز ءتىل تابىسىپ كەتتىم. قازاقستان تاريحى ساباعى قىزىقتى ءوتتى. الداعى ەكى اپتادا ومىرلىك دوستار تاۋىپ، ۇمىتىلماس ەستەلىكتەر جيناعىم كەلەدى».
ابدۋكاسيموۆا ۇلبانۋ، وزبەكستان:
«پولشادان، موڭعوليادان كەلگەن دوستارىممەن قىزىقتى ويىندار وينايمىز. كۇنىمىز وتە قىزىقتى وتۋدە. بۇل جەردە جۇرگەن ماعان قاتتى ۇنايدى».
«Jas Qazaq» لاگەرى – تەك تانىمدىق جوبا عانا ەمەس، ۇلتتىق بولمىس پەن تىلگە دەگەن سۇيىسپەنشىلىكتى وياتاتىن پلاتفورما. بۇل – شەتەلدە تۋىپ-وسكەن قازاق بالالارىنىڭ ءوز تامىرىن تەرەڭىرەك تانۋىنا بەرىلگەن ۇلكەن مۇمكىندىك.
ۇيىمداستىرۋشىلاردىڭ ايتۋىنشا، قاتىسۋشىلاردىڭ كوبى اتاجۇرتىمەن بايلانىسىن ۇزبەي، بولاشاعىن قازاقستانمەن بايلانىستىرۋعا قىزىعۋشىلىق تانىتادى. جوبانىڭ باستى ماقساتى – قازاق بالاسىنىڭ بويىنداعى ۇلتتىق سانا مەن رۋحتى ساقتاۋ.
