قازاقستاننىڭ ءبىرىنشى حانىمى سارا نازارباەۆا الماتى قالاسىنداعى پرەزيدەنت ءىس باسقارماسىنىڭ مەديتسينالىق ورتالىعىنا قاراستى ۇلتتىق گوسپيتالدە ەم قابىلداپ جاتىر. بۇل تۋرالى مەكەمە اكىمشىلىگى Informburo.kz سايتىنىڭ رەسمي ساۋالىنا بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
«پاتسيەنت قاجەتتى ەمدەۋ كۋرسىنان وتۋدە. بارلىق مەديتسينالىق شارا بەكىتىلگەن ستاندارتتارعا ساي جۇرگىزىلىپ، بىلىكتى مامانداردىڭ باقىلاۋىمەن جۇزەگە اسىرىلىپ جاتىر»، - دەلىنگەن حابارلامادا.
كلينيكا سارا نازارباەۆانىڭ ناقتى دياگنوزى مەن دەنساۋلىق جاعدايىنا قاتىستى مالىمەتتى جاريا ەتپەيتىندەرىن جەتكىزدى. ايتۋلارىنشا، بۇل — مەديتسينالىق قۇپيا. مۇنداي اقپارات تەك ناۋقاستىڭ ءوز كەلىسىمىمەن عانا بەرىلۋى مۇمكىن.
«مەديتسينالىق ەتيكا مەن كاسىبي جاۋاپكەرشىلىك قاعيداتتارىنا سايكەس، مەديتسينالىق ۇيىمدار ناۋقاستىڭ جەكە دەرەكتەرىن قۇپيا ساقتاۋ ءتارتىبىن قاتاڭ ۇستانۋى ءتيىس. اقپاراتتى جاريالاماۋ تۋرالى شەشىم پاتسيەنتتىڭ جەكە ومىرىنە قۇرمەت كورسەتۋ، ونىڭ قۇقىعىن قورعاۋ جانە ەمدەۋ پروتسەسىنە سىرتقى ارالاسۋدىڭ الدىن الۋ ماقساتىندا قابىلداندى»، – دەپ ناقتىلادى گوسپيتال اكىمشىلىگى.
ايتا كەتەيىك، مامىر ايىندا سارا نازارباەۆا قايتىس بولدى دەگەن قاۋەسەت تاراعان ەدى. الايدا بۇل اقپاراتتى ەكس-پرەزيدەنت نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي جوققا شىعاردى. كەيىننەن سارا الپىسقىزىنىڭ اۋرۋحاناعا جاتقىزىلعانى بەلگىلى بولدى.
