اقتوبەدە بيىكتىكتەن پاراشيۋتپەن سەكىرىپ، كوز جۇمعان كۋرسانتقا قاتىستى اقپارات تارادى، دەپ حابارلايدى "ادىرنا" ۇلتتىق پورتالى.
اۋە قورعانىسى كۇشتەرى اسكەري ينستيتۋتىنىڭ ەكىنشى كۋرسىندا وقيتىن كۋرسانت وقۋ-جاتتىعۋ كەزىندە قايتىس بولدى. قايعىلى وقيعا 15 شىلدە كۇنى تاڭەرتەڭ جوسپارلى پاراشيۋتپەن سەكىرۋ بارىسىندا ورىن العان.
بۇل تۋرالى اسكەري ينستيتۋتتىڭ ءباسپاسوز قىزمەتى حابارلادى.
رەسمي مالىمەتكە سايكەس، كۋرسانت پاراشيۋتپەن سەكىرۋ كەزىندە جاراقات العان. الدىن الا بولجام بويىنشا، پاراشيۋت تولىق اشىلماعان نەمەسە مۇلدە اشىلماعان. بۇل جاعدايدىڭ ناقتى سەبەپتەرى تەرگەۋ بارىسىندا انىقتالماق.
قورعانىس ۆەدومستۆوسى مارقۇمنىڭ وتباسىنا بارلىق قاجەتتى كومەك كورسەتىلىپ جاتقانىن مالىمدەدى. كۋرسانتتىڭ دەنەسى استانا قالاسىنا جەتكىزىلىپ، سوندا جەرلەنەدى. ەگەر ءولىم قىزمەتتىك مىندەتىن ورىنداۋ كەزىندە بولعانى دالەلدەنسە، وتباسىعا مەملەكەت تاراپىنان وتەماقى تولەنەدى.
بەيرەسمي اقپاراتقا سۇيەنسەك، سەكىرۋ 800 مەتر بيىكتىكتە وتكەن. كۋرسانت ۆزۆود قۇرامىندا ءۇشىنشى بولىپ سەكىرگەن. پاراشيۋتتەردى كۋرسانتتار وزدەرى الدىن الا دايىنداعان. بۇعان دەيىن دە مارقۇم بىرنەشە رەت پاراشيۋتپەن سەكىرۋ تاجىريبەسىنەن وتكەن. جاتتىعۋ ارنايى نۇسقاۋشىلار مەن وقىتۋشىلاردىڭ باقىلاۋىمەن جۇرگىزىلگەن. جەردە كەزەكشىلىك ەتكەن مەديتسينالىق بريگادا دا بولعانى حابارلاندى.
قازا تاپقان كۋرسانت اسكەري وقۋ ورنىنىڭ بەلسەندى تاربيەلەنۋشىلەرىنىڭ ءبىرى بولعان. بيىل كوكتەمدە ول حالىقارالىق كۋرسانتتار وليمپياداسىنا قاتىسىپ، ءتورت ادامنان تۇراتىن كوماندا قۇرامىندا جۇلدەلى ءۇشىنشى ورىندى يەلەنگەن.
مارقۇمنىڭ اكەسى — قورعانىس مينيسترلىگىنە قاراستى استاناداعى 25745 اسكەري بولىمدە قىزمەت ەتەتىن پولكوۆنيك.
اتالعان وقيعا بويىنشا قىلمىستىق ءىس قوزعالىپ، تەرگەۋ امالدارى باستالدى. ءتيىستى ساراپتامالار تاعايىندالىپ، وقيعانىڭ بارلىق ءمان-جايى انىقتالۋدا.