قازاقستاننىڭ ەڭبەك سىڭىرگەن قايراتكەرى، تەاتر جانە كينو اكتەرى، قاراعاندى ونەر ورداسىنىڭ ماقتانىشى قايرات كەمالوۆ 69 جاسىندا دۇنيەدەن وزدى، دەپ حابارلايدى "ادىرنا" ۇلتتىق پورتالى.
بۇل قارالى حاباردى قاراعاندى وبلىسىنىڭ اكىمى ەرماعانبەت بولەكپاەۆ ءوزىنىڭ Instagram پاراقشاسىندا مالىمدەدى.
«69 جاسقا قاراعان شاعىندا قازاقستاننىڭ ەڭبەك سىڭىرگەن قايراتكەرى، كورنەكتى اكتەر قايرات كەمالوۆ ومىردەن ءوتتى. ول بۇكىل سانالى عۇمىرىن تەاتر سالاسىنا ارنادى. قايرات كەمالوۆتىڭ ونەردەگى مانسابى قاراعاندىدا باستالعان ەدى. ونىڭ ونەردەگى جەتىستىكتەرى حالىقارالىق دارەجەدە جوعارى باعالانىپ، ءتۇرلى ماراپاتتارعا يە بولدى. ول تاريحي وبرازداردى سومداۋدا اكتەرلىك شەبەرلىگىمەن تانىلدى»، – دەپ جازدى ءوڭىر باسشىسى.
كەمالوۆتىڭ «ەر توستىك»، «اباي»، «قاراگوز»، «قوزى كورپەش – بايان سۇلۋ» سەكىلدى ۇلتتىق قويىلىمدارداعى باستى رولدەرمەن ەل ەسىندە قالدى.
ارىپتەستەرى مەن شاكىرتتەرى ونى كاسىبي، سابىرلى، پاراساتتى ادام رەتىندە ەسكە الادى.
«ول شەبەرلىگى، ماماندىققا دەگەن ۇلكەن ادالدىعى ارقاسىندا وتاندىق تەاتر جانە كينو تاريحىندا تەرەڭ ءىز قالدىردى. قايرات كەمالوۆتىڭ جارقىن بەينەسى ارىپتەستەرىنىڭ، شاكىرتتەرى مەن دوستارىنىڭ، كورەرمەندەردىڭ جۇرەگىندە ماڭگى قالادى»، – دەدى ەرماعانبەت بولەكپاەۆ.
