قازاقستاندىق بلوگەر قىتايدىڭ گۋانچجوۋ قالاسىندا “ۇرلىق جوق” دەگەن قاۋەسەتكە بايلانىستى قوعامدىق ورىندا ارانداتۋ ارەكەتتەرىن جاساعانى ءۇشىن جەرگىلىكتى قۇقىق قورعاۋ ورگاندارىنىڭ نازارىنا ىلىكتى، دەپ حابارلايدى "ادىرنا" ۇلتتىق پورتالى Tengri Life-قا سىلتەپ.
Sohu پورتالىنىڭ مالىمەتىنشە، بلوگەر الدىن الا تانىسىمەن كەلىسىپ، مەترو ىشىندە ونىڭ قالتاسىنان تەلەفوندى الىپ شىعىپ، ونى اينالاسىنداعى ادامدارعا ۇسىنعان. كەيىن “تەلەفون جوعالدى” دەپ، سول ماڭداعى جولاۋشىلاردى “ۇرلىق جاسادى” دەپ ايىپتاپ، ولاردى كوپشىلىك الدىندا “ۇرىلار” دەپ اتاعان.
سونىمەن قاتار، ول كوشەدە بەيتانىس ەر ادامدارعا جاقىنداپ، قولدارىنان ۇستاعان. قىتايلىق باق دەرەگىنشە، بلوگەر ءبىر جاس جىگىتكە جاقىنداپ، سانىنان ۇستاپ، ول كەيىن شەگىنگەندە، قولىنان تارتىپ ۇستاعانى ايتىلدى.
تاعى ءبىر بەينەدە ول بەيتانىس قىزعا يىعىمەن سۇيەنىپ، ونى شوشىتقان. بۇل ارەكەتتەرىن بلوگەر “الەۋمەتتىك ەكسپەريمەنت” دەپ تۇسىندىرگەنىمەن، قىتايلىق ينتەرنەت قولدانۋشىلار مۇنى ايەلدەر قۇقىعىن قورعاۋ زاڭى بويىنشا سەكسۋالدىق قۋدالاۋ دەپ باعالاعان.
بۇدان بولەك، بلوگەردىڭ ادامداردىڭ رۇقساتىنسىز بەينەروليك ءتۇسىرىپ، قوعامدىق ورىندا جانجال تۋعىزعانى، سونداي-اق جالعان ايىپتاۋلار جاساعانى بەلگىلى بولدى. بۇل ارەكەتتەر قىتاي زاڭدارىنا سايكەس اكىمشىلىك، ازاماتتىق، ءتىپتى قىلمىستىق جاۋاپكەرشىلىككە اكەپ سوعۋى مۇمكىن.
سايكەسىنشە، بلوگەردىڭ بارلىق اككاۋنتتارى قىتايلىق پلاتفورمالاردا بۇعاتتالىپ، ۆيدەولارى جويىلدى. گۋانچجوۋ قالاسىنىڭ پوليتسياسى وقيعاعا قاتىستى تەكسەرۋ جۇمىستارىن باستاعان.
ايتا كەتەيىك، بلوگەردىڭ ءوزى دە كەيىننەن بارلىق الەۋمەتتىك جەلىلەردەگى ۆيدەولارىن وشىرگەن.
