ىستامبۇلدا بەلگىلى زەرتتەۋشى دوسان بايمولدانىڭ "ەۋروپاداعى قازاق دياسپوراسىنىڭ تاريحى جانە قازىرگى جاعدايى" اتتى تاريحي-تانىمدىق كىتابىنىڭ تۇرىك تىلىنە اۋدارىلىپ، جارىق كورۋىنە بايلانىستى تۇساۋكەسەرى ءوتتى، دەپ حابارلايدى "ادىرنا" ۇلتتىق پورتالى.
ءىس-شاراعا تۇركيانىڭ زەرتتەۋشى-تاريحشى ماماندارى، مادەنيەت سالاسى مەن قالا اكىمشىلىگىنىڭ وكىلدەرى، قازاقستاننىڭ ىستامبۇلداعى كونسۋلدىعىنىڭ وكىلى، تۇركيالىق بۇقارالىق اقپارات قۇرالدارىنىڭ جۋرناليستەرى مەن ەۋروپا ەلدەرىندە تۇراتىن قازاق دياسپوراسىنىڭ وكىلدەرى قاتىستى.
تۇساۋكەسەرگە وراي قازاقستان رەسپۋبليكاسى سىرتقى ىستەر مينيسترلىگىنە قاراستى "وتانداستار" قورىنىڭ پرەزيدەنتى د. قادىروۆ، دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى ز. تۇرىسبەكوۆ، سونداي-اق قازاقستان جازۋشىلار وداعى باسقارماسىنىڭ توراعاسى م. قۇلكەنوۆ ارنايى قۇتتىقتاۋ حاتتارىن جولداپ، جىلى لەبىزدەرىن ءبىلدىردى.
كىتاپپەن الدىن الا تانىسقان تاريحشى-عالىمدار ەڭبەكتى تاريحي تۇرعىدان تىڭ، بۇرىن زەرتتەلمەگەن تاقىرىپقا ارنالعان ماڭىزدى جۇمىس رەتىندە باعالاپ، ونى قازاق دياسپوراسىنىڭ وتكەنى مەن بۇگىنىنە ارنالعان قۇندى دەرەككوز دەپ اتادى.
تۇساۋكەسەر ءراسىمىنىڭ سوڭى ۇلتتىق رۋحتاعى كونتسەرتتىك باعدارلاماعا ۇلاستى.
كىتاپتىڭ تۇرىك تىلىنە اۋدارىلىپ، باسپادان شىعۋىنا بەلگىلى تۇركيالىق كاسىپكەر مەحمەت الي ەنگين، «قازاق ەلى» جۋرنالىنىڭ باس رەداكتورى، جۋرناليست ەرتولقىن قايرەتۋللا، سونداي-اق كىتاپتى اۋدارعان رۋسلان بەرگەن مەن ءادىل دوسىباەۆ زور ۇلەس قوسقان.
اۆتور دوسان بايمولدا كىتاپقا تىلەكشى بولىپ، قولداۋ بىلدىرگەن بارشا ازاماتتارعا العىس ايتىپ، رۋحاني مۇرامىزدى شەت ەلدەرگە كەڭىنەن تانىتۋ ءىسى الداعى ۋاقىتتا دا جالعاسىن تاباتىنىنا سەنىم ءبىلدىردى.
