قازاقستاندىق وقۋشىلار بيولوگيا ءپانى بويىنشا الەمدەگى ەڭ بەدەلدى زياتكەرلىك دودا – IBO-2025 حالىقارالىق بيولوگيا وليمپياداسىنان ءتورت قولا مەدال جەڭىپ الدى، دەپ حابارلايدى "ادىرنا" ۇلتتىق پورتالى.
وليمپيادا بيىل فيليپپيندە ءوتتى.
80 ەلدەن 320-دان استام دارىندى جاس قاتىسقان بۇل سايىستا قازاقستان قۇراماسىنىڭ بارلىق مۇشەلەرى جۇلدەلى بولىپ، 100 پايىزدىق كوماندالىق ناتيجە كورسەتتى.
قولا مەدال يەلەنگەن وقۋشىلار قاتارىندا پاۆلودار وبلىسىنداعى ء«بىلىم-يننوۆاتسيا» ليتسەي-ينتەرناتىنىڭ 10-سىنىپ وقۋشىسى ەرسۋلتان قايىركەن، وسكەمەن قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى باتىر ەرجانۇلى، استانا قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ايعانىم بالتاشەۆا جانە الماتى قالاسىنداعى ء«بىلىم-يننوۆاتسيا» ليتسەي-ينتەرناتىنىڭ 8-سىنىپ وقۋشىسى اليحان اشىرحانوۆ بار.
كومانداعا عىلىمي جەتەكشىلىك ەتكەن – وتاندىق جاس بيولوگ-عالىمدار لەيلا اسقاروۆا مەن يلياس ساكيموۆ.
وليمپيادا ەكى نەگىزگى كەزەڭنەن تۇرادى: تەوريالىق بولىمدە قاتىسۋشىلار مولەكۋلالىق جانە جاسۋشالىق بيولوگيا، گەنەتيكا، ەكولوگيا، ەۆوليۋتسيا جانە بيوجۇيەلەۋ سالالارى بويىنشا كۇردەلى تاپسىرمالاردى ورىندادى. ال پراكتيكالىق بولىمدە زەرتحانالىق جۇمىستار، ميكروسكوپيا، ۇلگىلەرمەن جۇمىس ىستەۋ جانە بيولوگيالىق پروتسەستەردى تالداۋ سەكىلدى ناقتى تاجىريبەلىك داعدىلار سىنالدى.
قازاقستان 1994 جىلدان بەرى IBO وليمپياداسىنا تۇراقتى تۇردە قاتىسىپ كەلەدى. وسى ۋاقىت ارالىعىندا ۇلتتىق قۇراما 2 التىن، 18 كۇمىس، 56 قولا مەدال جانە 12 قۇرمەت گراموتاسىن جەڭىپ العان.
ايتا كەتەيىك، وتكەن جىلى قازاقستان بۇل بەدەلدى وليمپيادانى ءوز ەلىندە وتكىزىپ، تاعى دا 100 پايىزدىق ناتيجەگە قول جەتكىزگەن بولاتىن.
