قحر توراعاسى سي تسزينپين مەن رەسەي پرەزيدەنتى ۆلاديمير پۋتين بەيجىڭدەگى اسكەري پاراد الدىندا زاماناۋي تەحنولوگيالار ارقىلى ءومىر ءسۇرۋ ۇزاقتىعىن ارتتىرۋ مۇمكىندىگىن تالقىلادى، دەپ حابارلايدى «ادىرنا» ءتىلشىسى.
Bloomberg اگەنتتىگىنىڭ حابارلاۋىنشا، سي تسزينپين مەن ۆلاديمير ءپۋتيننىڭ اڭگىمەسىنىڭ ۇزىندىلەرى تىكەلەي ەفيرگە ءتۇسىپ قالعان. ولار كحدر ليدەرى كيم چەن ىنمەن بىرگە تيانانمەن قاقپاسىنا كوتەرىلىپ بارا جاتقان ساتتە اڭگىمەلەسكەن.
اڭگىمە ءبىر مينۋتتان از ۋاقىتقا سوزىلىپ، كەي جەرلەرىندە ءۇزىلىپ وتىرعان، سوندىقتان تەك جەكەلەگەن ۇزىندىلەر ەستىلگەن. جازبادا سي تسزينپين قىتاي تىلىندە «بۇگىنگى كۇنى» جانە «70 جاس» دەگەن سوزدەردى ايتقانى بايقالادى.
ءسوزدى اۋدارىپ تۇرعان اۋدارماشى كەيىن ورىس تىلىندە: «بۇرىن كەي ادامدار عانا 70 جاسقا دەيىن جەتەتىن، ال قازىر 70 جاستا سەن ءالى بالا سياقتىسىڭ»، – دەپ جەتكىزگەن.
ءپۋتيننىڭ ايتقان پىكىرى تىكەلەي ەفيردە انىق ەستىلمەگەن. الايدا اۋدارماشىنىڭ سوزدەرى جازىلىپ قالعان.
«بيوتەحنولوگيانىڭ دامۋىنىڭ ارقاسىندا ادام اعزالارىن ۇنەمى اۋىستىرۋعا بولادى، سوندا ادامدار جىل وتكەن سايىن جاسارىپ، ءتىپتى ماڭگىلىك ومىرگە قول جەتكىزە الادى»،—دەيدى ول.
ميكروفونعا جازىلعان ءبىر مينۋتقا جەتپەيتىن اڭگىمە سوڭىندا قىتاي كوشباسشىسى: «بولجامدار كورسەتكەندەي، 21-عاسىردا 150 جاسقا دەيىن ءومىر ءسۇرۋ مۇمكىندىگى بار»، – دەيدى.
قىتايعا ساپارىنىڭ قورىتىندىسى بويىنشا وتكەن ءباسپاسوز ءماسليحاتىندا ۆلاديمير پۋتين بۇل تاقىرىپتىڭ سي تسزينپينمەن تالقىلانعانىن راستادى.
«قازىرگى ساۋىقتىرۋ قۇرالدارى، مەديتسينالىق تاسىلدەر، سونىڭ ىشىندە ءارتۇرلى حيرۋرگيالىق ادىستەر، اعزالاردى اۋىستىرۋعا بايلانىستى مۇمكىندىكتەر سىندى دۇنيەلەو ادامزاتقا بەلسەندى ءومىردىڭ بۇگىنگىدەي ەمەس، ودان دا ۇزاق جالعاساتىنىنا ءۇمىت بەرەدى. ارينە، ءار ەلدەگى ورتاشا جاس ءارتۇرلى، بىراق سوعان قاراماستان ءومىر ءسۇرۋ ۇزاقتىعى ايتارلىقتاي ارتادى»، – دەدى ول جۋرناليستەرگە.
ايتا كەتەيىك، ۆلاديمير پۋتين مەن سي تسزينپين بۇگىندە 72 جاستا. ازىرگە ەكەۋى دە ىقتيمال مۇراگەرلەرىن اتاعان جوق.
