قازاقستان رەسپۋبليكاسى كونستيتۋتسياسىنىڭ 30 جىلدىق مەرەيتويىنا وراي تۇركىستاندا ءابدىسالان نۇرماحانوۆ اتىنداعى سپورت كەشەنى پايدالانۋعا بەرىلدى. زامان تالابىنا ساي عيماراتتىڭ اشىلۋ سالتاناتىنا تۇركىستان وبلىسىنىڭ اكىمى نۇرالحان كوشەروۆ، سپورتشىلار جانە سپورت ارداگەرلەرى قاتىستى. ءوڭىر باسشىسى كوپشىلىكتى عيماراتتىڭ اشىلۋىمەن قۇتتىقتاپ، بۇل سپورت كەشەنىنىڭ اشىلۋى – مەملەكەت تاراپىنان جاستارعا جاسالىپ وتىرعان قامقورلىقتىڭ ءبىر كورىنىسى ەكەنىن اتاپ ءوتتى.
ءوز كەزەگىندە چەمپيوننىڭ جارى كۇلپاش شايمەردەنوۆا يگى ىسكە ۇيىتقى بولعان ازاماتتارعا العىس ءبىلدىرىپ، جىلى لەبىزىن جەتكىزدى.
عيمارات بارلىق زاماناۋي تالاپتارعا ساي سالىنعان جانە تۇرعىنداردىڭ بۇقارالىق سپورتپەن اينالىسۋىنا، كاسىبي سپورتشىلاردىڭ دايىندىق وتكىزۋىنە تولىق مۇمكىندىك بەرەدى. سپورت كەشەنىنىڭ جالپى اۋماعى 4000 شارشى مەتردى قۇرايدى. بۇل نىسان تۇركىستان قالاسى اكىمدىگىنىڭ «قۇرىلىس ءبولىمى» تاپسىرىسىمەن، «Vek-stroy» جشس مەردىگەرلىگىمەن سالىندى.
قازىرگى تاڭدا قالادا بۇدان وزگە سپورتتىڭ كۇرەس، بوكس تۇرلەرىنە ارنالعان 4 كەشەن – ماقاتاەۆ كوشەسىندە، بەكزات مولتەك اۋدانىندا، تەرىسكەي كوشەسىندە جانە باياناۋىل اۋماعىندا سالىنىپ جاتىر.
ايتا كەتەيىك، تۇركىستان قالاسى وبلىس ورتالىعى بولعالى بەرى شاھاردا «تۇركىستان-ارەنا» ستاديونى، «Olympic Center» سپورت كەشەنى، «تەننيس ورتالىعى»، «مۇز سارايى» عيماراتتارى پايدالانۋعا بەرىلىپ، سپورتشىلارىمىز تىڭعىلىقتى جاتتىعۋ جۇمىستارىن جۇرگىزۋدە. قازىرگى تاڭدا ەسكەك ەسۋ كانالى مەن حالىقارالىق تالاپقا ساي اتشاباردىڭ قۇرىلىسى جۇرگىزىلىپ جاتىر. جىل باسىنان بەرى وبلىس سپورتشىلارى الەم، ازيا جانە قازاقستان رەسپۋبليكا چەمپيوناتتارىندا جالپى 1 122 مەدالدى جەڭىپ الدى. ۇلتتىق قۇراما ساپىنا وبلىستان 766 سپورتشى ەندى. بۇل كورسەتكىش وتكەن جىلمەن سالىستىرعاندا 150 سپورتشىعا ارتىپ وتىر.
ۇقساس جاڭالىقتار
