Qazaqstan Respublikasy Konstitusiiasynyŋ 30 jyldyq mereitoiyna orai Türkıstanda Äbdısalan Nūrmahanov atyndaǧy sport keşenı paidalanuǧa berıldı. Zaman talabyna sai ǧimarattyŋ aşylu saltanatyna Türkıstan oblysynyŋ äkımı Nūralhan Köşerov, sportşylar jäne sport ardagerlerı qatysty. Öŋır basşysy köpşılıktı ǧimarattyŋ aşyluymen qūttyqtap, būl sport keşenınıŋ aşyluy – memleket tarapynan jastarǧa jasalyp otyrǧan qamqorlyqtyŋ bır körınısı ekenın atap öttı.
Öz kezegınde chempionnyŋ jary Külpäş Şaimerdenova igı ıske ūiytqy bolǧan azamattarǧa alǧys bıldırıp, jyly lebızın jetkızdı.
Ǧimarat barlyq zamanaui talaptarǧa sai salynǧan jäne tūrǧyndardyŋ būqaralyq sportpen ainalysuyna, käsıbi sportşylardyŋ daiyndyq ötkızuıne tolyq mümkındık beredı. Sport keşenınıŋ jalpy aumaǧy 4000 şarşy metrdı qūraidy. Būl nysan Türkıstan qalasy äkımdıgınıŋ «Qūrylys bölımı» tapsyrysymen, «Vek-stroy» JŞS merdıgerlıgımen salyndy.
Qazırgı taŋda qalada būdan özge sporttyŋ küres, boks türlerıne arnalǧan 4 keşen – Maqataev köşesınde, Bekzat möltek audanynda, Terıskei köşesınde jäne Baianauyl aumaǧynda salynyp jatyr.
Aita keteiık, Türkıstan qalasy oblys ortalyǧy bolǧaly berı şaharda «Türkıstan-Arena» stadiony, «Olympic Center» sport keşenı, «Tennis ortalyǧy», «Mūz saraiy» ǧimarattary paidalanuǧa berılıp, sportşylarymyz tyŋǧylyqty jattyǧu jūmystaryn jürgızude. Qazırgı taŋda eskek esu kanaly men halyqaralyq talapqa sai atşabardyŋ qūrylysy jürgızılıp jatyr. Jyl basynan berı oblys sportşylary Älem, Aziia jäne Qazaqstan Respublika chempionattarynda jalpy 1 122 medaldy jeŋıp aldy. Ūlttyq qūrama sapyna oblystan 766 sportşy endı. Būl körsetkış ötken jylmen salystyrǧanda 150 sportşyǧa artyp otyr.
Ūqsas jaŋalyqtar
