فوتو: تاسس/EPA/PETER KLAUNZER
رەسەيلىك شاحماتشى جانە وپپوزيتسيالىق ساياساتكەر گارري كاسپاروۆ Halifax International Security Forum فورۋمىندا اقش-تىڭ ۋكرايناعا قاتىستى ۇستانىمىن سىنعا الدى. بەينەجازبا 21 قاراشادا فورۋمنىڭ YouTube ارناسىندا جاريالاندى، دەپ حابارلايدى “ادىرنا”.
كاسپاروۆتىڭ ايتۋىنشا، ۋكراينا – رەسەي فەدەراتسياسى اتتى اگرەسسور ەلدىڭ ارمياسىن تەجەپ، ونىڭ ەۋروپاعا ءارى قاراي وتۋىنە جول بەرمەي وتىرعان جالعىز كۇش.
"ماسەلە سىزدەگى قارۋ-جاراقتىڭ مولشەرىندە ەمەس. ماسەلە – ءسىز سوعىسۋعا جانە ولۋگە دايىنسىز با، سوعان تىرەلەدى. “لاتۆيادا كانادالىق بريگادا بار” دەيدى. بىراق بۇل بريگادانىڭ بۇيرىعى قانداي؟ ەگەر رەسەيلىكتەر شەكارادان وتسە، بۇل بريگادا وق اتا ما؟ جاۋابى بەلگىلى: بۇل اپتالارعا سوزىلاتىن كەلىسسوزدەر بولادى", – دەدى رەسەيلىك ساياساتكەر.
سونداي-اق، كاسپاروۆ اقش پرەزيدەنتى دونالد ترامپتىڭ بيزنەس-سەرىكتەسى ۇسىنعان "بەيبىتشىلىك جوسپارىن" قالايشا بايىپپەن تالقىلاۋعا بولاتىنىن تۇسىنبەيتىنىن ايتتى.
"بۇل – ريەلتورلىق مامىلە، ترامپ وتباسىنىڭ بايلىعىن ارتتىرۋ ماقساتىنداعى cينيكالىق سحەما، ونىڭ قۇنى – ۋكراينانى ساتۋ", – دەپ اتاپ ءوتتى ول.
كاسپاروۆتىڭ ايتۋىنشا، ناتو ەۋروپانى رەسەي اگرەسسياسىنان قورعاۋ ءۇشىن قۇرىلعان، ال بۇگىندە "بۇل – جالعان ۇيىم", سەبەبى بۇل مىندەتتى تەك ءبىر عانا ەل اتقارىپ وتىر، ول – ۋكراينا.
"ەگەر ۋكراينا بولماعاندا، رەسەي تانكىلەرى الدەقاشان پولشادا تۇرعان بولار ەدى. ال ءبىز ءالى كۇنگە دەيىن ونى ناتو-عا قابىلداۋ-قابىلداماۋدى تالقىلاپ وتىرمىز", – دەدى ساياساتكەر.
ودان بولەك، كاسپاروۆ ۆلاديمير پۋتين، قحر توراعاسى سي تسزينپين جانە "باسقا دا بارلىق ديكتاتورلار" قازىرگى جاعدايعا قول سوعىپ وتىر دەپ قوستى.
