الماتى دوحا قالاسىندا (كاتار مەملەكەتى) وتكەن وڭىردەگى ەڭ ءىرى تۋريستىك كورمەلەردىڭ ءبىرى — Qatar Travel Mart 2025 كورمەسىنە قاتىسۋىن اياقتادى.
ءىس-شاراعا 60-تان استام ەلدەن تۋريزم يندۋسترياسىنىڭ كاسىبي وكىلدەرى قاتىستى. كورمە حالىقارالىق بايلانىستى نىعايتۋعا، قالانىڭ تۋريستىك الەۋەتىن كەڭىنەن تانىستىرۋعا جانە جاڭا نارىقتارعا شىعۋعا مۇمكىندىك بەرگەن ماڭىزدى الاڭعا اينالدى.
الماتى ءتورت ماۋسىم بويى ساياحاتتاۋعا قولايلى باعىت رەتىندە ۇسىنىلدى: تۇمسا تابيعات، بەلسەندى دەمالىسقا ارنالعان زاماناۋي مۇمكىندىك، wellness-باعىتتار، گاسترونوميالىق ۇسىنىستار جانە ىسكەرلىك ءىس-شارالارعا ارنالعان دامىعان ينفراقۇرىلىم كەڭىنەن كورسەتىلدى.
كورمە اياسىندا الماتى دەلەگاتسياسى B2B فورماتىندا 150-دەن استام كەلىسسوز جۇرگىزدى. سونىڭ ناتيجەسىندە ءوڭىردىڭ جەتەكشى تۋروپەراتورلارى جانە اۋە تاسىمالداۋشىلارىمەن ىنتىماقتاستىق جونىندە الدىن الا ۋاعدالاستىق جاسالدى. كەلىسسوز قورىتىندىسى بويىنشا 36 كەلىسىمگە قول قويىلىپ، ولاردىڭ جۇزەگە اسۋى الماتىعا ءتۇرلى ەلدەردەن 5 000-نان استام تۋريست تارتۋعا مۇمكىندىك بەرەدى.
«بۇل وڭىردەن كەلەتىن تۋريستەر ءۇشىن ەڭ باستى قىزىعۋشىلىق – تابيعات. الماتى تاۋى، كولى، جاسىل ساياباقتارى جانە جازعى سالقىن كليماتى ارقىلى وسى تالاپقا تولىق ساي كەلەدى. اراب ەلدەرىنەن قىزىعۋشىلىقتىڭ ارتىپ كەلە جاتقانىن كورىپ وتىرمىز جانە ونى ودان ءارى كۇشەيتۋگە نيەتتىمىز»، — دەدى الماتى قالاسىنىڭ تۋريزم باسقارماسى ءتۋريزمدى ىلگەرىلەتۋ ءبولىمىنىڭ باسشىسى ەركەبۇلان ءابىحان.
كورمەدەگى باعدارلامانىڭ ەرەكشە بولىگى رەتىندە روۋد-شوۋ ۇيىمداستىرىلدى. قازاقستاننىڭ بەس تۋروپەراتورى پارسى شىعاناعى نارىعىنا ارنالعان تۋريستىك ونىمدەرىن تانىستىردى. ءىس-شارادا قازاقستان رەسپۋبليكاسىنىڭ دوحاداعى باس كونسۋلدىعىنىڭ وكىلى قۇتتىقتاۋ ءسوز سويلەدى. روۋد-شوۋعا ورتالىق ازيا ەلدەرىنىڭ ەلشىلىكتەرى، جەرگىلىكتى تۋريستىك كومپانيالار، باق جانە سەرىكتەس ۇيىمداردان 130-دان استام قوناق قاتىستى. بۇل كەزدەسۋ فورماتى الەۋەتتى كليەنتتەرمەن تىكەلەي بايلانىس ورناتۋعا جانە الماتىنىڭ تۋريستىك مۇمكىندىكتەرىنە قىزىعۋشىلىقتى ارتتىرۋعا جاعداي جاسادى.
QTM 2025 كورمەسىنە قاتىسۋ الماتى قالاسىن شەتەلدىك نارىقتاردا ىلگەرىلەتۋگە باعىتتالعان ۇزاق مەرزىمدى ستراتەگيانىڭ ءبىر بولىگى بولدى. كەلەسى كەزەڭدە سەرىكتەستىك بايلانىستى دامىتۋ، بىرلەسكەن جوبالاردى جۇزەگە اسىرۋ جانە پارسى شىعاناعى ەلدەرىنىڭ تۋريستەرى اراسىندا الماتىنى جايلى، قاۋىپسىز ءارى تابيعي تارتىمدى باعىت رەتىندە تۇراقتى قىزىعۋشىلىقتى قالىپتاستىرۋ جۇمىسى جالعاسادى.
