Almaty Doha qalasynda (Katar memleketı) ötken öŋırdegı eŋ ırı turistık körmelerdıŋ bırı — Qatar Travel Mart 2025 körmesıne qatysuyn aiaqtady.
Is-şaraǧa 60-tan astam elden turizm industriiasynyŋ käsıbi ökılderı qatysty. Körme halyqaralyq bailanysty nyǧaituǧa, qalanyŋ turistık äleuetın keŋınen tanystyruǧa jäne jaŋa naryqtarǧa şyǧuǧa mümkındık bergen maŋyzdy alaŋǧa ainaldy.
Almaty tört mausym boiy saiahattauǧa qolaily baǧyt retınde ūsynyldy: tūmsa tabiǧat, belsendı demalysqa arnalǧan zamanaui mümkındık, wellness-baǧyttar, gastronomiialyq ūsynystar jäne ıskerlık ıs-şaralarǧa arnalǧan damyǧan infraqūrylym keŋınen körsetıldı.
Körme aiasynda Almaty delegasiiasy B2B formatynda 150-den astam kelıssöz jürgızdı. Sonyŋ nätijesınde öŋırdıŋ jetekşı turoperatorlary jäne äue tasymaldauşylarymen yntymaqtastyq jönınde aldyn ala uaǧdalastyq jasaldy. Kelıssöz qorytyndysy boiynşa 36 kelısımge qol qoiylyp, olardyŋ jüzege asuy Almatyǧa türlı elderden 5 000-nan astam turist tartuǧa mümkındık beredı.
«Būl öŋırden keletın turister üşın eŋ basty qyzyǧuşylyq – tabiǧat. Almaty tauy, kölı, jasyl saiabaqtary jäne jazǧy salqyn klimaty arqyly osy talapqa tolyq sai keledı. Arab elderınen qyzyǧuşylyqtyŋ artyp kele jatqanyn körıp otyrmyz jäne ony odan ärı küşeituge niettımız», — dedı Almaty qalasynyŋ Turizm basqarmasy Turizmdı ılgerıletu bölımınıŋ basşysy Erkebūlan Äbıhan.
Körmedegı baǧdarlamanyŋ erekşe bölıgı retınde roud-şou ūiymdastyryldy. Qazaqstannyŋ bes turoperatory Parsy şyǧanaǧy naryǧyna arnalǧan turistık önımderın tanystyrdy. Is-şarada Qazaqstan Respublikasynyŋ Dohadaǧy Bas konsuldyǧynyŋ ökılı qūttyqtau söz söiledı. Roud-şouǧa Ortalyq Aziia elderınıŋ elşılıkterı, jergılıktı turistık kompaniialar, BAQ jäne serıktes ūiymdardan 130-dan astam qonaq qatysty. Būl kezdesu formaty äleuettı klienttermen tıkelei bailanys ornatuǧa jäne Almatynyŋ turistık mümkındıkterıne qyzyǧuşylyqty arttyruǧa jaǧdai jasady.
QTM 2025 körmesıne qatysu Almaty qalasyn şeteldık naryqtarda ılgerıletuge baǧyttalǧan ūzaq merzımdı strategiianyŋ bır bölıgı boldy. Kelesı kezeŋde serıktestık bailanysty damytu, bırlesken jobalardy jüzege asyru jäne Parsy şyǧanaǧy elderınıŋ turisterı arasynda Almatyny jaily, qauıpsız ärı tabiǧi tartymdy baǧyt retınde tūraqty qyzyǧuşylyqty qalyptastyru jūmysy jalǧasady.
