قازاقستاننىڭ وڭتۇستىگىندە تەمىرجول باعىتىندا ءىرى كەپتەلىس قالىپتاستى. وزبەكستانعا بەت العان 11 مىڭنان استام جۇك ۆاگوندارى قوزعالىسسىز تۇر، دەپ حابارلايدى "ادىرنا" ۇلتتىق پورتالى.
ولاردىڭ باسىم بولىگى استىق تاسىمالدايدى. كەيبىر پويىزداردىڭ كىدىرىسى 5–6 تاۋلىككە دەيىن جەتكەن.
قوزعالىس قيىنداعان نەگىزگى اۋماقتار – شەڭگەلدى ستانتسياسى مەن جىلعا جانە داربازا بەكەتتەرى.
«قازاقستان تەمىر جولى» ۇلتتىق كومپانياسىنىڭ مالىمەتىنشە، پويىزداردىڭ ۋاقىتىلى قابىلدانباۋى سالدارىنان كەستە بۇزىلعان. بۇل ماسەلەگە وزبەكستان تاراپىنىڭ سارىاعاش ستانتسياسىنا كەلەتىن پويىزداردى كەش قابىلداۋى سەبەپ بولعان.
داربازا ستانتسياسىنىڭ باستىعى عابيت ءسۇيىنوۆتىڭ ايتۋىنشا، قابىلداۋ مۇمكىندىگىنىڭ بولماۋىنا بايلانىستى جۇك پويىزدارى ۋاقىتشا وسى بەكەتكە جىبەرىلەدى. قازىر ۆاگوندار كۇزەتپەن قامتاماسىز ەتىلىپ، ترانزيتتىك جۇكتىڭ قوزعالىس مەرزىمىنىڭ ءوتىپ كەتۋ قاۋپى تۋىنداپ وتىر.
ال «قتج-جۇك تاسىمالى» شىمكەنت بولىمشەسىنىڭ ديرەكتورى نۇرداۋلەت بايعازيەۆ وزبەكستان تەمىرجولىنا پويىزداردى قابىلداۋ جانە وڭدەۋ جۇمىستارىن جەدەلدەتۋ ماقساتىندا تەحنيكالىق كومەك كورسەتىلىپ جاتقانىن مالىمدەدى.
كەپتەلىستى ازايتۋ ءۇشىن سارىاعاش ستانتسياسىندا ۆاگوندار تاۋلىك بويى قابىلدانىپ جاتىر. الايدا ماماندار ماسەلەنى تۇبەگەيلى شەشۋ ءۇشىن كەشەندى شارالار قاجەت ەكەنىن اتاپ ءوتتى.
قازىرگى تاڭدا مەملەكەت باسشىسىنىڭ تاپسىرماسىمەن داربازا–ماقتارال تەمىرجول جەلىسىنىڭ قۇرىلىسى جۇرگىزىلۋدە. جوبا اياسىندا بەس جاڭا ستانتسيا اشىلىپ، بۇل سارىاعاش باعىتىنىڭ جۇكتەمەسىن 40 پايىزعا تومەندەتىپ، كەپتەلىس ماسەلەسىن تولىق شەشۋگە مۇمكىندىك بەرەدى دەپ جوسپارلانعان.
