ۋكراينا پرەزيدەنتى ۆلاديمير زەلەنسكي سوعىس جاعدايىندا سايلاۋ وتكىزۋگە دايىن ەكەنىن، بىراق بەلگىلى ءبىر شارتتار ورىندالۋى كەرەكتىگىن مالىمدەدى. ونىڭ ايتۋىنشا، ەلدە قاۋىپسىزدىك قامتاماسىز ەتىلىپ، زاڭناماعا وزگەرىستەر ەنگىزىلۋى ءتيىس. بۇل تۋرالى ول ۋكراينالىق جانە شەتەلدىك جۋرناليستەرمەن كەزدەسۋ كەزىندە ايتتى، دەپ حابارلايدى «ادىرنا» ءتىلشىسى.
پرەزيدەنت حالىقارالىق سەرىكتەستەر سايلاۋ كەزىندە قاۋىپسىزدىكتى قامتاماسىز ەتە السا، پرەزيدەنتتىك سايلاۋعا دايىن ەكەنىن جەتكىزدى. سونداي-اق ول سوعىس جاعدايىندا سايلاۋدى رەتتەيتىن زاڭناماعا وزگەرىستەر ەنگىزۋگە ءازىر ەكەنىن جانە وسى باعىتتا پارلامەنتتەن ۇسىنىستار كۇتەتىنىن ايتتى.
زەلەنسكيدەن اقش ۋكرايناعا سايلاۋ ماسەلەسى بويىنشا قىسىم جاسادى ما جانە دەلەگاتسيالار ۋكرايناداعى ىقتيمال پرەزيدەنتتىك سايلاۋدى تالقىلادى ما دەگەن سۇراق قويىلدى.
«مەن بۇل ماسەلەنى تالقىلاعان جوقپىن. بۇل — باسقانىڭ ەمەس، ۋكراينا حالقىنىڭ ماسەلەسى. سەرىكتەستەرىمىزگە قۇرمەت بىلدىرە وتىرىپ، سايلاۋعا دايىن ەكەنىمدى ايتامىن»،- دەدى زەلەنسكي.
ونىڭ ايتۋىنشا، سايلاۋ وتكىزۋ ءۇشىن ەكى ماسەلەنى شەشۋ قاجەت.
ء«بىرىنشىسى — سوعىس جاعدايىندا قاۋىپسىزدىكتى قامتاماسىز ەتۋ ماسەلەسى، ال ەكىنشىسى — سايلاۋدىڭ زاڭدى وتكىزىلۋىن قامتاماسىز ەتەتىن قۇقىقتىق نەگىزدى رەتتەۋ. مەن اقش-تان، قاجەت بولسا، ەۋروپالىق ارىپتەستەرمەن بىرگە، سايلاۋ وتكىزۋ ءۇشىن قاۋىپسىزدىكتى قامتاماسىز ەتۋگە كومەكتەسۋىن سۇراپ وتىرمىن. ونداي مۇمكىندىك بولسا، 60–90 كۇن ىشىندە ۋكراينا سايلاۋ وتكىزۋگە دايىن بولادى. مەنىڭ بۇعان نيەتىم بار، دايىندىق دەڭگەيىم دە جەتكىلىكتى»، — دەدى ۆلاديمير زەلەنسكي.
ۋكراينا پرەزيدەنتى سوعىستىڭ ۇزاققا سوزىلۋىن ونىڭ بيلىگىن ساقتاپ قالعىسى كەلەتىنىمەن بايلانىستىراتىن بولجامداردى «اقىلعا قونىمسىز» دەپ اتادى.
ەسكە سالا كەتەيىك، بۇعان دەيىن اقش پرەزيدەنتى دونالد ترامپ Politico باسىلىمىنا بەرگەن سۇحباتىندا سوعىس جالعاسىپ جاتقانىنا قاراماستان، ۋكراينادا جاڭا پرەزيدەنتتىك سايلاۋ وتكىزۋ ۋاقىتى كەلگەنىن ايتقان ەدى.
