قازاقستان حالىقارالىق مۇناي تاسىمالداۋ باعىتتارىن كەڭەيتۋ ماقساتىندا كاسپي قۇبىر كونسورتسيۋمى (كتك) جۇيەسىنەن تىس نەگىزگى ەكسپورتتىق مارشرۋتتارعا مۇناي اعىمدارىن قايتا باعىتتاۋدى كەلىسىم بەردى. بۇل تۋرالى «قازترانسويل» اق ءباسپاسوز قىزمەتى مالىمدەدى، دەپ حابارلايدى "ادىرنا".
كومپانيا مالىمەتىنشە، ەنەرگەتيكا مينيسترلىگى بەكىتكەن باستاپقى تاسىمال كەستەسىمەن سالىستىرعاندا، 2025 جىلدىڭ جەلتوقسانىندا ەكسپورت كولەمى ايتارلىقتاي ارتادى:
-
اتىراۋ – سامارا باعىتى بويىنشا — 232 مىڭ تونناعا،
-
قىتاي باعىتى بويىنشا — 72 مىڭ تونناعا،
-
اقتاۋ پورتى ارقىلى باكۋ – تبيليسي – دجەيحان باعىتىنا — 58 مىڭ تونناعا ۇلعايعان.
«قازترانسويل» ءوندىرۋشى كومپانيالارعا جەلتوقسان ايىندا مۇنايدى ۋاقىتشا ساقتاۋ ءۇشىن رەزەرۆۋارلىق پاركتە ورىن ۇسىنىلاتىنىن دا اتاپ ءوتتى. بۇل شارا تاسىمال كەستەسىن يكەمدى ەتۋگە جانە لوگيستيكانى وڭتايلاندىرۋعا مۇمكىندىك بەرەدى.
كومپانيانىڭ حابارلاۋىنشا، قابىلدانعان شەشىمدەر ماگيسترالدىق قۇبىر جۇيەسىنىڭ جۇمىسىن تۇراقتى ۇستاپ تۇرۋعا، ايداۋ رەجيمدەرىن وڭتايلاندىرۋعا جانە ەكسپورتتىق جەتكىزىلىمدەردىڭ ۇزدىكسىزدىگىن قامتاماسىز ەتۋگە باعىتتالعان.
قازاقستاننىڭ مۇناي مارشرۋتىن ءارتاراپتاندىرۋى گەوساياسي تاۋەكەلدەردى تومەندەتۋگە جانە ەكسپورتتىق مۇمكىندىكتەردى كەڭەيتۋگە ىقپال ەتەدى.
