اباي وبلىسى اكىمىنىڭ قولداۋىمەن، اباي وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ جانە اباي كىتاپحاناسىنىڭ ۇيىمداستىرۋىمەن «اباي جولى» كىتاپحاناسى جوباسى اياسىندا جارىق كورگەن كىتاپتار توپتاماسىنىڭ تۇساۋكەسەرى ءوتتى.
كىتاپتار توپتاماسى جوباسىن قۇرۋ قازاقستاننىڭ مادەنيەتى مەن ادەبيەتىنىڭ دامۋىنا ىقپال ەتۋگە، تۋعان ولكەمىزدەن شىققان ۇلى تۇلعالارىمىز بەن اقىن-جازۋشىلارىمىزدىڭ تۋىندىلارىن قايتا جاڭعىرتىپ شىعارۋعا، تۇلعالارىمىزدىڭ اتىن ايگىلەۋگە، جاستاردى وتانسۇيگىشتىككە تاربيەلەۋگە باعىتتالعان.
كىتاپتار توپتاماسى اباي وبلىسى وڭىرىنەن شىققان اقىن-جازۋشىلاردىڭ، ونەر ادامدارىنىڭ ءارتۇرلى ادەبي جانردى قامتيتىن ءتۇرلى تاقىرىپتارىنىڭ باسىن بىرىكتىرەدى.
اقىن-جازۋشىلاردىڭ شىعارمالارىن باعالاۋ جانە جاريالاۋ جونىندەگى كەڭەسكە شاكارىم ۋنيۆەرسيتەتىنىڭ پروفەسسورى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، «اباي وبلىسىنىڭ قۇرمەتتى ازاماتى» ەسپەنبەتوۆ اراپ ءسلامۇلى جەتەكشىلىك ەتتى.
اعىمداعى جىلى جوبا اياسىندا 19 اۆتوردىڭ 25 كىتابى جارىق كوردى. ۇلى ابايدىڭ 180 جىلدىق مەرەيتويىنا وراي اباي تاقىرىبىنا باسىم كوڭىل ءبولىندى.
اتاپ ايتقاندا، مۇحتار اۋەزوۆتىڭ «اباي جولى» رومان-ەپوپەياسى، قايىم مۇحامەدحانوۆتىڭ «ابايدىڭ اقىن شاكىرتتەرى» جانە «اباي مۇراگەرلەرى» اتتى زەرتتەۋ ەڭبەكتەرى، كامەن ءورازاليننىڭ «اباي اۋىلىنا ساياحات» اتتى دەرەكتى شىعارماسى جانە مىرزاقاسىم اسەت مەدەۋحانۇلىنىڭ «اباي ەلىنىڭ اڭگىمەلەرى»، اسان وماروۆتىڭ «اباي رۋحانياتى» ەڭبەكتەرى وقىرمان قاۋىمعا جول تارتتى.
142 جىلدىق تاريحى بار اباي كىتاپحاناسىنىڭ سيرەك قورىنداعى بەلگىلى ولكەتانۋشى نيكولاي كونشيننىڭ ولكەمىزگە قاتىستى قۇندى ەڭبەكتەرى مەن مۇراتبەك كەنەمولديننىڭ «سەمەي – الاشتىڭ قالاسى» اتتى زەرتتەۋلەر مەن ماقالالار جيناعى وقىرمان قاۋىم ءۇشىن توسىن سىي بولدى.
ءحىح عاسىردىڭ سوڭى – حح عاسىردىڭ باسىندا ءومىر سۇرگەن قازاق حالقىنىڭ دارىندى اقىنى اسەت نايمانبايۇلىنىڭ جانە ابايدىڭ اقىندىق مەكتەبىنىڭ ءىرى وكىلدەرىنىڭ ءبىرى، ۇلى ويشىلدىڭ شاكىرتى ءارى ءىنى-دوسى كوكباي جاناتايۇلىنىڭ، سونداي-اق رەسپۋبليكامىزعا اتى ءمالىم ءارى جازبا، ءارى سۋىرىپ سالما اقىنداردىڭ ءبىرى قاليحان التىنباەۆتىڭ ادەبي مۇرالارى ءوز وقىرماندارىمەن قاۋىشتى.
سونىمەن قاتار، ولكەمىزدەن شىققان عالىمدار ابدەش تولەۋباەۆتىڭ «قازاقتاردىڭ ءداستۇرلى نانىم-سەنىمدەرى»، سۆەتلانا سماعۇلوۆانىڭ «قازاق دالاسىنداعى جۇتتار مەن اشارشىلىقتار»، ءابىل-سەرىك الىاكباردىڭ «قالام قۇدىرەتى» اتتى عىلىمي ەڭبەكتەرى جارىققا شىقتى.
ابايدىڭ اقىن شاكىرتتەرىنەن باستاپ، قازاق ادەبيەتىندەگى شوقتىعى بيىك اقىنداردىڭ تاڭدامالى ولەڭدەرى، تولعاۋلارى، پوەما جانە ايتىس ۇلگىلەرى ەنگەن «جىر جاۋھارلارى» جيناعىنىڭ 3-ءشى كىتابى جاريالاندى.
قازىرگى ۋاقىتتا قازاق ادەبيەتىندە وزىندىك ورنى بار مەدەۋ سارسەكەنىڭ، قايىم-مۇنار تابەەۆتىڭ، تىنىشتىقبەك ابدىكاكىمۇلىنىڭ، ادىلعازى قايىربەكوۆتىڭ، قايىربەك شاعىردىڭ شىعارمالارى دا جارىق كوردى.
شاراعا قاتىسۋشى قوناقتاردى اتالعان كىتاپتاردان جاساقتالعان، اۆتورلاردىڭ پورترەتتەرىمەن كومكەرىلگەن جاڭا كىتاپتار ەكسپوزيتسياسى قارسى الدى.
جاساندى ينتەللەكتىنىڭ كومەگىمەن جاسالعان ەلەكتروندى كىتاپحانا قورى ۇسىنىلىپ، قاتىسۋشىلارعا كىتاپ مازمۇنى تۋرالى مول اقپارات بەرىلدى.
كىتاپحانا ساحناسىندا اباي اتىنداعى دراما تەاترىنىڭ ارتىستەرى كىتاپ اۆتورلارى مەن ولاردىڭ شىعارمالارىنا بايلانىستى ادەبي-كوركەم قويىلىمداردى ورىندادى.
«اباي جولى» كىتاپحاناسى جوباسىنىڭ عۇمىرى ۇزاق بولسىن! اقىن ەسىمىن يەلەنگەن وبلىس جۇرتشىلىعى مەن ادەبيەتسۇيەر قاۋىمعا جول تارتقان جاۋھار تۋىندىلار ءاربىر وقىرماننىڭ تالعام تارازىسىنان شىعادى دەگەن سەنىمدەمىز.
ريما قاناپياقىزى،
اباي اتىنداعى وبلىستىق امبەباپ كىتاپحاناسى
