قازاقستان مەن يران الداعى ۋاقىتتا حالىقارالىق ۇيىمدار اياسىندا ءوزارا ىقپالداستىعىن جالعاستىرا بەرەدى، دەپ حابارلايدى "ادىرنا" ۇلتتىق پورتالى اقورداعا سىلتەپ.
بۇل تۋرالى يران يسلام رەسپۋبليكاسىنىڭ پرەزيدەنتى ماسۋد پەزەشكيانمەن كەلىسسوزدەر قورىتىندىسىنا وراي وتكەن ءباسپاسوز ءماسليحاتىندا مەملەكەت باسشىسى قاسىم-جومارت توقاەۆ مالىمدەدى.
پرەزيدەنتتىڭ ايتۋىنشا، ەكى ەل اراسىنداعى مادەني-گۋمانيتارلىق بايلانىس ءاردايىم ءوزارا قارىم-قاتىناستىڭ التىن كوپىرى بولىپ سانالادى.
«يران مۇراعاتتارىندا ساقتالعان قازاق تاريحىنا قاتىستى بىرقاتار كونە قولجازبانىڭ كوشىرمەسىن اكەلگەن ەكەن. وندا 18 عاسىرداعى ۇلت شەجىرەسى مەن مادەنيەتىنە قاتىستى قۇندى دەرەكتەر بار»، — دەدى قاسىم-جومارت توقاەۆ.
مەملەكەت باسشىسى بۇل قۇجاتتار قازاق عالىمدارىنا قازاق حاندىعىنىڭ سول كەزەڭدەگى حالىقارالىق قاتىناستارىن تەرەڭ زەرتتەۋگە مۇمكىندىك بەرەتىنىن اتاپ ءوتتى.
«وسى رەتتە مادەنيەت جانە اقپارات مينيسترلىگىنە يراننىڭ ءتيىستى مەكەمەلەرىمەن بىرلەسىپ، ەلىمىزدە كونە قولجازبالار كورمەسىن ۇيىمداستىرۋدى تاپسىردىم. سونىمەن بىرگە ءبىز يران تاراپىمەن بىرلەسىپ، قازاق جەرىندە ۇلى ويشىل ءابۋ ناسىر ءال-فارابي مۇراسىنا ارنالعان تاريحي-مادەني كەشەن سالۋ جونىندە كەلىسىمگە كەلدىك. بۇگىن ءبىلىم جانە عىلىم سالاسىنداعى ىنتىماقتاستىقتى كۇشەيتۋ جولدارى دا تالقىلاندى. ەكى ەلدىڭ مەديتسينا قىزمەتكەرلەرى ءوزارا تاجىريبە الماسىپ، بىلىكتىلىگىن ارتتىرۋ باعىتىندا جۇمىس جۇرگىزەتىن بولادى»، — دەدى پرەزيدەنت.
قاسىم-جومارت توقاەۆ كەلىسسوزدەر بارىسىندا حالىقارالىق احۋال دا تالقىلانعانىن ايتتى.
«قارۋلى قاقتىعىستاردىڭ، سانكتسيالىق قىسىمدار مەن ساۋدا سوعىستارىنىڭ كۇشەيۋىنە الاڭداۋشىلىق بىلدىردىك. حالىقارالىق ۇيىمداردىڭ بەدەلىنىڭ تومەندەۋىنە قاتىستى پىكىر الماستىق. بۇۇ ءرولىن كۇشەيتۋ، ونىڭ قارارلارى مەن جارعىلارىن قاتاڭ ساقتاۋ، حالىقارالىق قۇقىق قاعيداتتارىن ىلگەرىلەتۋ جانە ادىلدىككە بەرىك بولۋ تۋرالى ورتاق ۇستانىمعا كەلدىك. بارلىق جانجالداردى ديپلوماتيالىق كەلىسسوزدەر ارقىلى بەيبىت جولمەن شەشۋ قاجەت ەكەنىن اتاپ وتتىك»، — دەدى مەملەكەت باسشىسى.
ونىڭ ايتۋىنشا، قازاقستان مەن يراننىڭ كەڭەيتىلگەن سەرىكتەستىگىن نىعايتۋ ەكى ەل حالىقتارىنىڭ مۇددەسىنە ساي كەلەدى.
«بۇگىنگى كەلىسسوزدەر ناتيجەلى بولدى دەۋگە تولىق نەگىز بار. ەكى ەلدىڭ دوستىعى ماڭگى بولسىن»، — دەدى قاسىم-جومارت توقاەۆ.
ايتا كەتەيىك، بۇعان دەيىن پرەزيدەنت اقوردادا رەسمي ساپارمەن كەلگەن يران يسلام رەسپۋبليكاسىنىڭ پرەزيدەنتى ماسۋد پەزەشكياندى قارسى العان بولاتىن. كەيىن تاراپتار شاعىن قۇرامدا كەلىسسوز وتكىزىپ، قورىتىندى بويىنشا بىرلەسكەن مالىمدەمە قابىلداپ، 8 قۇجاتقا قول قويدى.
