قازاقستان پرەزيدەنتى قاسىم-جومارت توقاەۆ جاپونيا پرەمەر-ءمينيسترى ساناە تاكايچيمەن كەلىسسوزدەر جۇرگىزىپ، ونىڭ قورىتىندىسى بويىنشا بىرلەسكەن مالىمدەمە جانە 14 ۇكىمەتارالىق ءارى ۆەدومستۆوارالىق قۇجاتقا قول قويىلدى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
كەلىسسوزدەر ناتيجەسىندە تاراپتار ەكىجاقتى ىنتىماقتاستىقتى نىعايتۋعا باعىتتالعان قۇجاتتار توپتاماسىن بەكىتتى. مەملەكەت باسشىسى جاپون تاراپىنا قازاقستاندىق دەلەگاتسيانى جىلى قابىلداعانى ءۇشىن العىس ايتىپ، بۇل ساپار قازاقستان مەن جاپونيا اراسىنداعى قارىم-قاتىناستا ماڭىزدى بەلەس ەكەنىن اتاپ ءوتتى.
پرەزيدەنت توقاەۆ جاپونيانى ازياداعى ۋاقىت سىنىنان وتكەن سەنىمدى سەرىكتەس رەتىندە سيپاتتاپ، ەلدىڭ كوپعاسىرلىق ءداستۇرى مەن زاماناۋي يننوۆاتسيانى ۇيلەستىرە بىلگەنىن ايتتى. سونداي-اق 2004 جىلى باستاماشى بولعان «ورتالىق ازيا + جاپونيا» فورماتىنىڭ ماڭىزىن ەسكە سالىپ، جاپونيانىڭ وسى فورماتتىڭ العاشقى اۆتورى ەكەنىن اتاپ ءوتتى.
ءوز كەزەگىندە جاپونيا پرەمەر-ءمينيسترى ساناە تاكايچي قازاقستان پرەزيدەنتىنىڭ رەسمي ساپارى ەكى ەل اراسىنداعى ىنتىماقتاستىققا جاڭا سەرپىن بەرەتىنىن مالىمدەدى. ول قازاقستاندى ەركىن ءارى اشىق حالىقارالىق ءتارتىپتى نىعايتۋداعى ستراتەگيالىق سەرىكتەس رەتىندە باعالاپ، ءوزارا ءتيىمدى قاتىناستاردى ودان ءارى دامىتۋعا دايىن ەكەنىن جەتكىزدى.
ساناە تاكايچي - 2025 جىلدىڭ قازان ايىندا پرەمەرلىككە كەلگەن ساياساتكەر.
