استانادا جەكەمەنشىك ستوماتولوگيالىق كلينيكادا 18 ءتىسىن ەمدەۋ بارىسىندا كوز جۇمعان ءۇش جاسار قىزدىڭ ولىمىنە قاتىستى سوت پروتسەسى جالعاسىپ جاتىر، دەپ حابارلايدى "ادىرنا" ۇلتتىق پورتالى Tengrinews-كە سىلتەپ.
18 جەلتوقساندا وتكەن ءجارىسسوز كەزىندە پروكۋرور ايىپتالۋشى انەستەزيولوگقا امنيستيا قولدانۋدى سۇرادى.
مەملەكەتتىك ايىپتاۋشى ەركەبۇلان شالقاروۆ سوتتان ايىپتالۋشىنى ءتورت جىلعا باس بوستاندىعىنان ايىرىپ، ءۇش جىل مەرزىمگە مەديتسينالىق قىزمەت كورسەتۋگە بايلانىستى لاۋازىمداردى اتقارۋ قۇقىعىنان ايىرۋدى سۇرادى. ايىپتاۋ تاراپى ءىس بويىنشا جەڭىلدەتەتىن دە، اۋىرلاتاتىن دا ءمان-جايلار انىقتالماعانىن مالىمدەدى.
سونىمەن قاتار پروكۋرور كونستيتۋتسيانىڭ 30 جىلدىعىنا بايلانىستى قابىلدانعان امنيستيا تۋرالى زاڭعا سايكەس بۇل قىلمىستى ونشا اۋىر ەمەس قىلمىستار ساناتىنا جاتقىزۋ قاجەت ەكەنىن اتاپ ءوتتى. وسىعان بايلانىستى ايىپتالۋشىنى نەگىزگى جازادان بوساتۋدى سۇرادى.
سونداي-اق پروكۋرور دەنساۋلىق ساقتاۋ مينيسترلىگىنىڭ بۇيرىقتارىندا انەستەزياعا قارسى كورسەتىلىمدەردىڭ ناقتى ءتىزىمى جوق ەكەنىن، دارىگەر مەن انەستەزيولوگتىڭ تالداۋلار مەن انامنەزدى باعالاۋداعى مىندەتتەرى ناقتى كورسەتىلمەگەنىن ايتتى. وسى ولقىلىقتاردى جويۋ ءۇشىن سوتتان مينيسترلىككە قاتىستى جەكە قاۋلى شىعارۋدى ءوتىندى.
وسىعان ۇقساس تاعى ءبىر وقيعا قاراعاندى وبلىسىنىڭ بالقاش قالاسىندا تىركەلدى. مۇندا سوت پاتسيەنتتىڭ ولىمىنە قاتىستى ايىپ تاعىلعان حيرۋرگكە قاتىستى قىلمىستىق ءىستى مەرزىمنىڭ وتۋىنە بايلانىستى توقتاتىپ، ونى قىلمىستىق جاۋاپكەرشىلىكتەن بوساتتىى.
قازتاگ مالىمەتىنشە، قىلمىستىق قۇقىق بۇزۋشىلىق 2023 جىلعى 6 قاراشادا ورىن العان. ال قىلمىستىق جاۋاپكەرشىلىككە تارتۋ مەرزىمى ەكى جىل بولعان. وسىعان بايلانىستى ءىس نەرەابيليتاتسيالىق نەگىزدەر بويىنشا توقتاتىلدى.
تەرگەۋ بارىسىندا حيرۋرگتىڭ كلينيكالىق حاتتامالاردى بۇزىپ، حيرۋرگيالىق ارالاسۋ تۋرالى شەشىمدى دەر كەزىندە قابىلداماعانى جانە دۇرىس ەمەس ەم تاكتيكاسىن تاڭداعانى انىقتالعان. بۇل ناۋقاستىڭ جاعدايىنىڭ ناشارلاۋىنا، كەيىننەن ولىمىنە اكەلگەن.
پروكۋرور ءىستى مەرزىمنىڭ وتۋىنە بايلانىستى توقتاتۋدى سۇراسا، جابىرلەنۋشى تاراپ بۇعان قارسىلىق ءبىلدىرىپ، ايىپتاۋ ۇكىمىن شىعارۋدى تالاپ ەتكەن. سوت قاۋلىسى ازىرگە زاڭدى كۇشىنە ەنگەن جوق.
