الەۋمەتتىك جەلىلەردە قازاقستان رەسپۋبليكاسىنىڭ مەملەكەتتىك تۋىن اۆتوكولىكتەرگە ىلۋگە قاتىستى پىكىرتالاس كۇشەيە ءتۇستى. وسىعان بايلانىستى ىشكى ىستەر مينيسترلىگى رەسمي تۇسىنىكتەمە جاريالادى، دەپ حابارلايدى "ادىرنا" ۇلتتىق پورتالى.
ءىىم مالىمەتىنشە، ەلىمىز بويىنشا پوليتسيا قىزمەتكەرلەرى جول قوزعالىسى ەرەجەلەرىن ورەسكەل بۇزۋدىڭ 82 دەرەگىن انىقتاعان. اتالعان ازاماتتار مەملەكەتتىك تۋدى پايدالانا وتىرىپ، جول ەرەجەلەرىن قاساقانا بۇزىپ، كولىك قوزعالىسىنا كەدەرگى كەلتىرگەن، سونداي-اق وزدەرىنىڭ جانە وزگە دە جول قوزعالىسىنا قاتىسۋشىلاردىڭ قاۋىپسىزدىگىنە قاتەر توندىرگەن.
مينيسترلىك مۇنداي جاعدايدا پوليتسيا زاڭعا سايكەس ارەكەت ەتۋگە مىندەتتى ەكەنىن اتاپ ءوتتى. سونىمەن قاتار كەيبىر ازاماتتار جاۋاپكەرشىلىككە مەملەكەتتىك تۋدى پايدالانعانى ءۇشىن تارتىلدى دەگەن پىكىر ءبىلدىرىپ جۇرگەنىن حابارلادى.
"بۇل اقپارات شىندىققا سايكەس كەلمەيدى. ازاماتتار مەملەكەتتىك تۋدى پايدالانعانى ءۇشىن ەمەس، ناقتى جول قوزعالىسى ەرەجەلەرىن بۇزعانى ءۇشىن جاۋاپكەرشىلىككە تارتىلدى. جالعان اقپارات تاراتقانى ءۇشىن دە زاڭدا جاۋاپكەرشىلىك كوزدەلگەن", — دەلىنگەن ءىىم حابارلاماسىندا.
سونىمەن بىرگە جۇرگىزىلگەن تەكسەرۋ ناتيجەسىندە الماتى جانە شىمكەنت قالالارىندا جەكەلەگەن پوليتسيا قىزمەتكەرلەرىنىڭ زاڭسىز، قۇقىققا قايشى ارەكەتتەرگە بارعانى انىقتالعان. بۇل فاكتىلەر بويىنشا ناقتى شارالار قابىلدانعان.
اتاپ ايتقاندا، 8 پوليتسيا قىزمەتكەرى، ونىڭ ىشىندە باسشىلىق قۇرام وكىلدەرى تارتىپتىك جاۋاپكەرشىلىككە تارتىلىپ (سوگىس، قاتاڭ سوگىس), تاعى 4 قىزمەتكەر اتقارىپ وتىرعان لاۋازىمىنان بوساتىلعان.
ءىىم زاڭدىلىق پەن زاڭ الدىندا ءبارىنىڭ تەڭدىگى قاعيداتىن قاتاڭ ۇستاناتىنىن مالىمدەدى.
"قازاقستان رەسپۋبليكاسىنىڭ مەملەكەتتىك تۋى — تاۋەلسىزدىك پەن ەگەمەندىكتىڭ قاسيەتتى نىشانى. ىشكى ىستەر مينيسترلىگى ازاماتتاردى مەملەكەتتىك رامىزدەرگە قۇرمەتپەن قاراپ، جول قوزعالىسى ەرەجەلەرىن قاتاڭ ساقتاۋعا شاقىرادى", — دەلىنگەن حابارلامادا.
ايتا كەتەيىك، بۇعان دەيىن مادەنيەت مينيسترلىگى اۆتوكولىكتەرگە مەملەكەتتىك تۋدى ءىلۋ ماسەلەسىنە قاتىستى تۇسىنىكتەمە بەرگەن ەدى.
