ينگۋشەتيانىڭ مادەنيەت مينيسترلىگى رەجيسسەر امۋر امەرحانوۆتىڭ 1944 جىلى كەڭەستىك بيلىك جۇرگىزگەن دەپورتاتسيادان كەيىن ينگۋش حالقىنىڭ وتانىنا ورالۋىنا ارنالعان «حات» ءفيلمىن كورسەتۋگە تىيىم سالدى. بۇل تۋرالى Fortanga جازدى، دەپ حابارلايدى «ادىرنا» ءتىلشىسى.
ينگۋش ۇلتتىق كينوستۋدياسى تۇسىرگەن جوبا رەسەي فەدەراتسياسىنىڭ مادەنيەت مينيسترلىگى تاراپىنان ماقۇلدانىپ، فەدەرالدىق گرانت العان بولاتىن. ءتۇسىرىلىم جۇمىستارى 2021 جىلى باستالعان. الايدا باسىلىم مالىمەتىنشە، فيلمدە كەڭەستىك بيلىكتىڭ دەپورتاتسيا كەزىندەگى ءرولى سىنالعاندىقتان، جۇمىس بارىسىندا-اق كارتينانى قارالاۋ ارەكەتتەرى جاسالعان.
فيلم ينگۋشەتيانىڭ وزىندە ءىس جۇزىندە بۇعاتتالعانىنا قاراماستان، رەسەيدىڭ بىرقاتار وڭىرلەرىندە جانە شەتەلدە كورسەتىلگەن. «حات» ءفيلمى الداعى ۋاقىتتا رەسپۋبليكادان تىس جەرلەردە كورسەتىلمەك. سونداي-اق تۋىندى يوردانيادا وتەتىن Karama Human Rights Film Festival Team جانە بانگلادەشتەگى Dhaka International Film Festival كينوفەستيۆالدەرىنە قاتىسۋعا ىرىكتەلگەنى حابارلاندى.
Fortanga دەرەگىنشە، رەسپۋبليكا تۇرعىندارى ينگۋشەتيا مادەنيەت مينيسترلىگىنىڭ Telegram-ارناسىندا ءفيلمنىڭ قاشان كورسەتىلەتىنى تۋرالى بىرنەشە رەت سۇراعان. مينيسترلىك پروكاتقا رۇقسات بەرەتىن سەرتيفيكاتسىز كورسەتىلىم ۇيىمداستىرا المايتىنىن ايتقان.
«الايدا فەدەرالدىق زاڭ مەن رف مادەنيەت مينيسترلىگىنىڭ تۇسىندىرمەلەرىنە سايكەس، پرەمەرالىق جانە پرەمەرا الدىنداعى كورسەتىلىمدەر ءۇشىن مۇنداي كۋالىك تالاپ ەتىلمەيدى»، — دەپ جازادى باسىلىم.
Gazetaingush.ru مالىمەتىنشە، فيلم وڭتۇستىك قازاقستان، ماسكەۋ وبلىسى مەن ماسكەۋ، بەلارۋس، ابحازيا، گرۋزيا، وزبەكستان اۋماعىندا جانە ينگۋشەتيادا تۇسىرىلگەن.
فيلم ناقتى وقيعالارعا نەگىزدەلگەن جانە ينگۋش حالقى اتىنان كەڭەس كوسەمى لەونيد برەجنەۆكە حات جەتكىزگەن ينگۋش كوممۋنيستەرى توبى تۋرالى باياندايدى. ساپار بارىسىندا ولاردى جاس ونكوحيرۋرگ ەرتىپ جۇرەدى. كارتينادا باستى كەيىپكەردىڭ بالالىق شاعى، قازاقستانعا جەر اۋدارىلعان كەزەڭدى ەسكە الاتىن ساتتەرى كورسەتىلەدى.
ەسكە سالايىق، 1944 جىلى 500 مىڭ شەشەن-ينگۋش قازاقستان مەن قىرعىزستانعا كۇشتەپ جەر اۋدارىلعان ەدى. ولاردىڭ 187 مىڭى سولتۇستىك قازاقستان وبلىسىنان پانا تاپقان. كەڭەس بيلىگى كاۆكاز حالىقتارىن ەركىنەن تىس كوشىرۋدى "چەچەۆيتسا وپەراتسياسى" دەپ اتادى.
