تاشكەنتتە ءوتىپ جاتقان كاراتەدەن ازيا چەمپيوناتىندا قازاقستاندىقتار بۇگىنگى جارىس كۇنىندە ءتورت التىن مەدال جەڭىپ الدى، دەپ حابارلايدى "ادىرنا" ۇلتتىق پورتالى.
ەرەسەكتەر اراسىنداعى قۇرلىق بىرىنشىلىگىنە العاش رەت قاتىسقان دايانا دارەنسكايا 68 كەلىگە دەيىنگى سالماقتا جاپوندىق كاما تسۋباسانى فينالدا سەنىمدى جەڭىپ، چەمپيون اتاندى.
ودان كەيىن تاتاميگە شىققان الەم چەمپيوناتىنىڭ قولا جۇلدەگەرى نۇرقانات اجىكەنوۆ (-75 كگ) يراندىق قارسىلاسىنا ەش مۇمكىندىك بەرمەي، التىن مەدال يەلەندى.
تاعى ءبىر التىن مەدالدى توكيودا وتكەن وليمپيادانىڭ قولا جۇلدەگەرى سوفيا بەرۋلتسەۆا (+68 كگ) اكەلدى. ول جاپون سپورتشىسى سۋميرە سۋگيتۋدى جەڭدى.
بۇعان دەيىن كۋميتە باعدارلاماسىندا جولامان بيعابىل دا التىن مەدال ەنشىلەگەن بولاتىن.
«قازاقستان قۇراماسى ءتورت التىن، ءبىر كۇمىس جانە ءتورت قولا مەدال جەڭىپ، جالپىكوماندالىق ەسەپتە ءبىرىنشى ورىندى يەلەندى»، – دەپ حابارلادى قر مادەنيەت جانە سپورت مينيسترلىگىنىڭ ءباسپاسوز قىزمەتى.
ەكىنشى ورىندا – جاپونيا ء(ۇش التىن، بەس كۇمىس، ءتورت قولا), ءۇشىنشى ورىندا – ۆەتنام ء(ۇش التىن مەدالمەن).
«بۇل – قازاقستان ءۇشىن ازيا چەمپيوناتتارىنىڭ تاريحىنداعى جالپىكوماندالىق ەسەپتەگى ەكىنشى جەڭىس. 2023 جىلى مالايزيادا وتكەن چەمپيوناتتا ءۇش التىن مەدال ءبىرىنشى ورىن الۋعا جەتكىلىكتى بولعان»، – دەلىنگەن اقپاراتتا.
بيىلعى چەمپيوناتقا 29 ەلدەن 421 سپورتشى قاتىسۋدا.
