اقتاۋدا حالىقارالىق تەڭىز پورتىنىڭ پرەزيدەنتى اباي تۇرىكپەنباەۆ ۇستالدى، دەپ حابارلايدى «ادىرنا» ءتىلشىسى orda.kz-كە سىلتەمە جاساپ.
«پورت پرەزيدەنتى قاماۋعا الىنعانى جايلى اقپاراتتى بىرنەشە دەرەككوز راستادى. ونىڭ ىشىندە قۇقىق قورعاۋ ورگاندارى دا بار. ءبىزدىڭ مالىمەتىمىزشە، تۇرىكپەنباەۆ قازىر تەرگەۋ يزولياتورىندا وتىر. ونىڭ ءىسى بويىنشا تەرگەۋدى ۇقك قولعا العان»،—دەلىنگەن حابارلامادا.
ۇستالعان اباي تۇرىكپەنباەۆقا قاتىستى قىلمىستىق ءىس مۇناي كونترابانداسىمەن بايلانىستى بولۋى مۇمكىن. 2023 جىلدىڭ شىلدەسىندە «باتىسنەفتەترەيد» جشس-نە تيەسىلى «مەليانا» تانكەرى ارقىلى قازاقستاننان زاڭسىز مۇناي جونەلتپەك بولعان. الايدا ۇقك بۇل وپەراتسيانىڭ ەگجەي-تەگجەيىن ءالى كۇنگە دەيىن اشىپ ايتقان جوق.
ايتا كەتەيىك، اباي تۇرىكپەنباەۆ بۇل قىزمەتكە 2017 جىلى تاعايىندالعان. ونىڭ الدىندا قۇرىق پورتىنىڭ باس ديرەكتورى، اقتاۋ پورتىنىڭ تەحنيكالىق ماسەلەلەر جونىندەگى ۆيتسە-پرەزيدەنتى قىزمەتتەرىن اتقارعان.
