اقمولا وبلىسىندا قۇربان ايت مەرەكەسى قالاي اتالىپ وتەدى؟

789
Adyrna.kz Telegram
https://adyrna.kz/content/uploads/2025/06/whatsapp-image-2025-06-05-at-11.16.08-960x500.jpeg?token=2f92a6d5269dd566c19bd8fc175f9ae5
2025 جىلعى 6 ماۋسىم كۇنى اقمولا وبلىسىندا، ەلىمىزدىڭ بارلىق ايماقتارىنداعىداي، مۇسىلمان جۇرتشىلىعىنىڭ ەڭ قاسيەتتى مەرەكەلەرىنىڭ ءبىرى — قۇربان ايت كەڭ كولەمدە اتالىپ وتەدى. بۇل مەيرام مۇسىلمان الەمى ءۇشىن يمانعا بەرىكتىك، قۇرباندىق، جاناشىرلىق پەن بىرلىكتىڭ سيمۆولىنا اينالعان، دەپ حابارلايدى وڭىرلىك كوممۋنيكاتسيالار قىزمەتىنەن. عاسىرلار قويناۋىنان جەتكەن قۇربان ايت كۇنى مەيىرىمدىلىك، شۇكىرشىلىك جانە اينالاداعى ادامدارعا قامقورلىق كورسەتۋ سەكىلدى ماڭگىلىك قۇندىلىقتاردى ەسكە سالادى. قۇربان ايت مەرەكەسىنىڭ تاريحى پايعامبار يبراھيم (ع.س.) وقيعاسىمەن تىعىز بايلانىستى. ول اللانىڭ امىرىمەن ۇلىن قۇربان ەتۋگە دايىن بولعانى ءۇشىن جاراتقان وعان مال شالۋدى بۇيىرعان. وسىدان باستاپ مۇسىلماندار اللا رازىلىعى ءۇشىن قۇربان شالىپ، يمانىن كۇشەيتۋدى، مۇقتاج جاندارعا جاردەم بەرۋدى داستۇرگە اينالدىرعان.
«شاريعات بويىنشا، قۇربان شالۋ — جاعدايى بار ءاربىر مۇسىلمانعا مىندەت. قۇرباندىققا قوي، ەشكى، سيىر نەمەسە تۇيە شالۋعا بولادى. مالدىڭ دەنى ساۋ، جاسى مەن تالاپتارعا ساي بولۋى شارت. ەڭ باستىسى — نيەت پەن شىنايىلىق»، — دەدى باس يمام قۋانىش ءسابيت.
ونىڭ ايتۋىنشا بيىل قۇربان ايتقا ارنالعان ايت نامازى 6 ماۋسىم كۇنى ساعات 06:00-دە كوكشەتاۋ مەن وبلىستاعى بارلىق مەشىتتەردە وقىلادى. نامازدان كەيىن بىردەن قۇرباندىق شالۋ ءراسىمى باستالادى. وبلىس اۋماعىندا سانيتارلىق تالاپتارعا ساي ارنايى بەكىتىلگەن مال سويۋ الاڭدارى مەن قاساپحانالار جۇمىس ىستەيتىن بولادى. سونداي-اق، Qurban2025.kz ونلاين پلاتفورماسى ارقىلى قاشىقتان قۇرباندىق شالۋعا تاپسىرىس بەرۋگە مۇمكىندىك بار. قۇربان ايتتىڭ قارساڭىندا، 5 ماۋسىم كۇنى — ارافا كۇنى مۇسىلماندار ورازا ۇستاپ، دۇعا-تىلەكتەرمەن رۋحاني تازارۋعا ۇمتىلادى. بۇل كۇننىڭ ماڭىزىن پايعامبارىمىز مۇحاممەد (س.ع.س.): «ارافا كۇنگى ورازا وتكەن جانە كەلەسى جىلدىڭ كۇنالارىن كەشىرەدى» — دەپ سيپاتتاعان. وبلىستاعى مەشىتتەردە وسى كۇننىڭ ءمان-ماعىناسىن تۇسىندىرەتىن ۋاعىزدار مەن ءتۇسىندىرۋ شارالارى وتەدى. قۇربان ايت — تەك قۇلشىلىق پەن قۇرباندىق شالۋ عانا ەمەس، ول — قايىرىمدىلىق، كەشىرىم مەن باۋىرمالدىقتى ناسيحاتتايتىن رۋحاني مەيرام. ءداستۇر بويىنشا، قۇرباندىق ەتى ۇشكە ءبولىنىپ، ءبىرى — ءوز وتباسىنا، ەكىنشىسى — تۋىستارعا، ءۇشىنشىسى — مۇقتاج جاندارعا تاراتىلادى. بۇل — ادامداردى جاقىنداستىراتىن، قوعامداعى ءوزارا تۇسىنىستىك پەن تاتۋلىقتى كۇشەيتەتىن يگى امال.
پىكىرلەر